susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ta marbuta | Ametsetan galduta »

Izkiriaturik aurkitu ditudan ene poemak / Joseba Sarronandia / Pamiela, 1985

Izkiriaturik aurkitu ditudan ene poemak Iñaki Camino / Argia, 1986-01-12

Sarritan gertatzen omen da olerki bat irakurtzen duzunean, zurea dela edo aurretik poema hori zure gogo inkonszientean jadanik bazegoela iruditzea, horregatik aurkitu ditu Joseba Sarrionandiak horrelako olerki asko munduko eta atzo eta gaurko literatura askotan.

Liburu hau, olerki bilduma da, hizkuntza eta garai guztietako olerkien bilduma, Sarrionaindiak azken hamar urteetan irakurri eta itzulitakoena. Poesia mundialaren katalogoa dugu alde horretatik, arbitrarioa, Sarrionaindiak berak dioen bezala, jakina. Grezia zaharreko epigramaegile haienak ditugu, gerla, gizarte-bizitza eta sexu berekoek alkarren artean zituzten sexu-harremanak hainbeste maite zituztenenak, baita Adrian Henrirenak, maitea falta duenean, saltxitxa bokadiloei gehitzeko saltsarik sekula ez legokeela dioenarenak, kanpotik etorritako anglosajoiek zanpatutako poeta indioenak ditugu ere, erreserbetara zeramatzatenean anaien odola gogoan poesia egiten zuten haiena. Pavese, Dylan Thomas, Blaga, Baudelaire, Melville, anonimo jermano, txino, anglosaxoi, miskito, tuareg, araukano eta eskimalak, Lutazio Katulo, Eugenio de Andrade, Rilke, Auden, Petronio, Martzial eta beste hainbeste ere badira ia 300 orrialdeko poesiz betetako liburu honetan.