Gauerakoan / Kepa Fernandez de Larrinoa / Susa, 1984

Gauerakoan Iñaki Kamino / Argia, 1984-06-10

Keparen aurren olerki-liburua duzue Susa sailak literatura argitaratzeari eskainitako seigarrena. 29 olerki dira denetara. Bi alde ditu: Bizi naizen mundu honetan eta Zutaz. Lehen alde honetan gaiak, natura, injustizia, ihes-nahia, minberatasuna (hau oso nabarmena), itxaropenik eza, ilusio galdua eta negatibidadea dakarren oro dena. Ahapaldi laburretan biltzen ditu Kepak bat bestearen gainean ezarritako lerro motzak. Estiloa narratiboa da, zuzenki kondatzen du idazleak, eta idazten duen horretan erraz nabaritu daiteke lehena eta ilusioa oraina eta minberatasunaren aurka doazela. Bigarren aldian bigarren pertsona bat sartzen da olerkietan. Bigarren pertsona hori, itsasoa, gaua edota maizenik, maitalea izanen da. Estiloa ez da aldatu, berriz ere olerti objetiboa aurkitzen dugu, metafora gutxiduna, sortzen duen bizikizunari aberastasuna badario ere, hitzek ez dute irudi ederrik sortuko, ez dute hitz-jokoek aberastasunik erdietsi. Lerro motzak, eta aurreneko zatian legez, errimadunak, errima oso maitea baitu idazleak. Olerki hauetan ederki sortutako bizikizun xarmagarriak ugari dira, baina hitzek joko eta irudirako indarra falta dute oraindik.