« Martin Ugalde edo idazle zirrara (I) | Kultura proletarioaz »

Itsasoa ur-bazter luzea da / Martin Ugalde / Gero, 1973

“Itsasoa ur-bazter luzea da” Anjel Lertxundi / Zeruko Argia, 1973-03-25

Honela deritza Martin Ugaldek Gero-n atera duen nobelari. Ederki adierazten du Carlos Bizkarrondo margolariak liburuaren azalean, mendien bizkar ondotik, “itsasoa ur-bazter luzea dela”.

Liburuak, nobelaren izena darama, baina Gero-ren 22garren liburua ez du nobela honek bakarrik osatzen. Martin Ugalde beraren beste hiru ipui ere badakazki: Lohiezko bide zaharra, Ijitoak, Jesus haurra jaio da.

Dionisio Amundarainek euskeratua eta herrikoitasunean anaia sentitzen duen Iñaki Zabala Sarria-ri eskainia dauka Martinek bere liburu hau.

Ezaguna da gure artean Martin Ugalde. Elkarrizketa argi asko azaldu zuen Z. ARGIAn Venezuelatik etorri berri hartan. Baina gure artean ez ezik ezaguna da Venezuela eta Hegoamarika osoan, Alemanian, Bretaina Haundian eta Frantzian.

Eguneroko baten zuzendari izana da Venezuelan. Kazetalaritzan ez ezik, ordea, ipuingintzan eta nobelagintzan ere artetsu eta argia da.

Maixu den batek eginak dira, beraz, Itsasoa ur-bazter luzea da deituriko liburuan datozen nobela eta ipuinak.

Gerraren ekaitzak, Hegoamarikako ibiliak eta Euskal Herriaganako maitasunak hornitutako gizonak burututako liburua dugu oraingo hau. Behin baino gehiagotan entzuna dugu, lanetik leher eginik etxera heltzean irakurtzeko moduko libururik falta zaigula. Hona bat aukerakoa zenbait ordu-pasa atsegin eta probetxugarririk egin ahal izateko.

Ez dugu uste irakurleari damutuko zaionik liburu hau eskuratzeaz.