susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Klasikoa | Iragana »

Hitz hits; paperezko mihisetan lits / Arantza Etxeburua / Kutxa, 1991

Itxaropenaren ahots hitsa Agustin Aranzabal / Euskaldunon Egunkaria, 1993-02-14

Badatozela idazle berriak. Hori pentsa daiteke, ikusiak ikusita. Sariketa batzuetan behintzat lan politak erakusten hasiak dira han eta hemengo idazle gazteak, 63ko kinta famatutik beherakoak.

Kasu honetan, 66koa dugu egilea, liburuan bertan esaten zaigunez. Esaten zaigun beste kontu bat, Euskal Filologian lizentziatua dela da. Beraz, 63koa ez izan arren, Etxeburua 63ko belaunaldiaren joeraren jarraitzailetzat jo genezake, Xabier Mendiguren Elizegik Gorka Arreseri egotzi eta honek berea zenik ukatu zuen teoria ez hain desegokiaren arabera.

Kontuak kontu, eta etiketak etiketa, Euskal Filologiarena aipatzeko moduko kontua da, nire ustez, liburu hau komentatzen hasita. Izan ere, Etxeburuaren poesiaren soinua garai eta molde askotako euskal poema eta euskal olerkien oihartzunez osatzen baita. Kasu hauetan ohizkoa eta topikoa bada ere, egileak egin duenagatik baino egitera iritsi daitekeenarengatik iruditu zait interesgarri poema liburu hau. “Neoizko argien / egunsenti faltsuan, / eromenean, / berba jario agortezinean / edabe majikoari gogor eutsiz / hor dira / ordu galduak edanaz / gaueko intxisuak”. Inguruko errealitateari erreparatzeko gaitasun poetiko bat badagoela erakusten digute honelako lerroek.

Dena den, argi dago poesiarena bide luze eta nekeza dela, eta ziur aski ordu luze eta neke handien ondoren burutua den “Hitz hits; paperezko mihisetan lits” poemario honek ez duela, berez eta bere horretan, aportazio ikaragarririk euskal letrentzat. Baina hemen egindako lana ez zuen —espero dezagun— alferrik egingo Arantza Etxeburuak. Poesia arloko Irun Hiria saria eskuratzeko baino gehiago balio izango ziola iruditzen zait. Eta halaxe izan dadila espero dut.