susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Garai hartako heroia | Heriorekin jolasean »

Jorge de Oteiza (Artea eta pentsamendua) / Andoni Alonso / Iñaki Arzoz / Gaiak, 1996

Oteiza dela-eta Javier Rojo / El Correo, 1996-08-29

Herri honetan zaila da Jorge Oteizari buruz zerbait esatea, polemika batean sartu gabe. Artista honek aldeko sutsu bezanbat kontrako porrokatu baitauzka. Bestaldetik, pertsonak (pertsonaiak) bere obra gainditzen du, bien arteko mugak jartzea ia-ia ezinezkoa delarik. Erdibideak, orekak, ezinezkoa dirudi. Pertsonaia honengana hurbiltzen saiatzen naizen bakoitzean, beti inpresio berbera gelditzen zait: haren obrei buruzko iritziek obrek berek baino garrantzi handiagoa dutela. Obra irekiaren onurak, nolabait, batez ere abangoardiako poetika batetik ikusita. Eta bere obrei buruzko interpretazioez gain, artistaren beraren hitzak ditugu, gai desberdinei buruzko diskurtsoak emanez, logika arruntak agintzen ez duen errealitate maila batetik. Gauzak horrela, Oteizaz irudi osoa emateko asmoa izan dute Iñaki Arzoz eta Andoni Alonsok liburu honetan, ikuspuntu desberdinetatik aztertuz. Horretarako, artistak eragina izan dezakeen arlo guztiei (artea, estetika, euskara, poesia…) kapitulo bana eskeini diete. Baina batzutan ezin izan dituzte pertsonaiak jartzen dituen mugak gainditu; eta artearen mundua kanpotik ikusten duen irakurle batek pentsa lezake pertsonaiari dioten miresmenaren erakusgarri egin dutela liburu hau.