« Aspaldian bila zenbiltzana | Alderraiak »

Abuztuaren hamabosteko trena / Luis Mari Mujika / Erein, 1996

Galdutako trenak Javier Rojo / El Correo, 1996-10-10

L. M. Mujikaren liburuxka honetan bi narrazio agertzen dira. Lehenengoa (liburuari izena ematen diona eta 1992.ean “Imajina ezazu Euskadi” Saria irabazi duena) dudarik gabe garrantzitsuena da. Euskal Herri tradizionalaren desagerpenaren inguruan aritzen da, modernitatearen zurrunbiloan bazterturik gelditu den baserri giroko Euskal Herria, hain zuzen. Bizitza tradizional horrekin batera euskararen desagerpena ere jasaten duen Euskal Herria. Gaia nahikoa topikoa da, beraz, Peru Abarka-n ere horren aztarnak aurkitu daitezke-eta. Hortaz, interesgarriagoa da gaia garatzeko erabiltzen diren elementuei ohartzea. Naturalezaren presentzia sinbolikoa, adibidez. Edo, hainbeste lekuren euskal izenak aipatuz, toponimiari ematen zaion garrantzia, irudikatu nahi balu bezala hizkuntza, pertsonekin barik, lurrarekin lotuta dagoela. Bestaldetik, herrian gelditzen ez den trenaren presentzia ere hor dago. Eta mundu horren desagerpenaren kontra altxatuta, agure setatia, bere betiko bizitza egiten. Elementu hauen sinbologia batzutan nabarmenegia da, ordea, eta narrazioa alegoriaren mailan jartzen du. Bigarren narrazioak, neurri handi batean, ezaugarri berberak ditu, baina istorioa, historikoa nolabait, garrantzi gabea da, ia-ia txiste baten parekoa.