« Marinel korapiloak | Galdutako trenak »

Psikosia / Robert Bloch (Javi Cillero) / Elkar, 1996

Aspaldian bila zenbiltzana Xabier Mendiguren Elizegi / Argia, 1996-10-06

Baditut nik lagunak, noizbehinkako irakurleak, ni liburu kontu honetan oso sartuta nagoela-eta, halaxe galdetzen didatenak tarteka: “Esaidazu irakurtzeko moduko liburu bat, baina ez roiloso horietakoa: erraza izan dadila, eta entretenitua”. Idazle batek pena hartzen du, bere barrenak hustu, garunak urtu eta, zerbait ona egin duelakoan, hori dena “roiloa” iruditzen bazaio gero irakurleari. Baina, bestalde, onartu beharra dago irakurlea dela hemen jaun eta jabe, bere esku dagoela liburua ireki edo ixtea: zer esanik ez eskua patrikan sartu eta mila pezetatik gora gastatzeko eskatzen badiogu.

Zuretzat, bada, irakurle, gaurko aholkua: Psikosia delako nobela honetan oinarritu zen Hitchcock izen bereko filme ospetsua egiteko. Hori, berez, izan daiteke aski garantia, intrigaren maisuak ez baitzuen batere begi txarra istorio indartsuei antzemateko. Interesez eta arnasari eutsita irakurtzen da eleberri hau: soberako hitzik, deskribapenik edo gogoetarik gabe, zuzen kontatzen ditu idazleak gertaerak, irakurlearengan nahi duen eragina piztuz: beldurra, jakinmina, oilo-ipurdia jartzerainoko izukara.

Euskara zailegiak ematen dizula beldurra? Lasai: Cillerok lan bikaina egin du, egilearen prosa sendo eta irakurterraza euskuratzean, testuak berez korritzen baitu eta orrialdeak pasa ahala ahaztu egiten zara itzulpena den ala ez, kontakizunaren sarean harrapatuta.