susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Idaztearen emaitza | Haurtzaroko kontuak »

Bizitza pusketak / Jabier Muguruza / Erein, 1996

Bakartasunaren aurpegiak Javier Rojo / El Correo, 1996-12-26

Bizitza pusketak deitzen da Jabier Muguruzaren azken liburua, eta izenak izana hemen ere badakarrelarik, benetan horren aurrean gaudela aitortu behar. Zortzi narraziok osatzen dute liburu hau eta narrazio bakoitzean bizitza arrunta daraman pertsonaia arrunt batek betetzen du ardatz nagusiaren papera. Narrazio bakoitzean bizitza arrunt horren zatitxo bat erakusten zaigu. Guztiek antzeko egitura daukate: inolako berezitasun nabarmenik ez daukan pertsonaia bati zerbait berezia gertatzen zaio, bizitza horren monotonia nolabait apurtzen duena. Baina gertatzen zaion hori ere zeharo arrunta izanik, nekez merezi du abenturaren izena, zeren bizitzaren linealtasuna piska bat okertzen duten gertaera xumeak besterik ez baitira. Honek, ordea, ez du esan nahi pertsonaiarentzat garrantzitsuak ez direnik. Gertaera xumeak, edonori gerta dakizkionak izanik ere, pertsonaia zehatz bati momentu zehatz batean gertatzen zaizkionean, pertsonaia horrengan funtsezkoak izan daitezke. Izan ere, amodioa edota gaixotasuna bezalako gauza arruntek bizitza bat alda dezakete. Eta hau nabarmenagoa da pertsonaien ezaugarririk nagusienari erreparatzen badiogu: aldez edo moldez, guztiek erakusten baitigute bakartasunaren aurpegietakoren bat.