susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Lertxundiren izenean, guztion gizenean | Marlowe, oroimenean »

Urdaibaiko ipuin eta kondairak / Edorta Jimenez / Alfaguara-Zubia, 1996

Urdaibaiko istorioak Javier Rojo / El Correo, 1997-01-30

Edorta Jimenezek liburu honekin hain ondo ezagutzen duen Urdaibai ingurura eraman gaitu hango istorioak kontatzeko. Batzuk, Jaun Zuriarena adibidez, nahiko ezagunak dira eta eskualde horretan dute gertalekua. Beste batzuk inguru hartako tradiziotik hartuak dira. Liburua kontakizun desberdinez osatuta egon arren, nobela bat izango balitz bezala irakur liteke, kontakizun guztiok testuan nolabait lotuta agertzen baitira: alde batetik, fikzio-marko berean integratuta agertzen dira (ohar batzuetan oinarritutako ikerketa bat); eta, bestetik, guztiak aldez edo moldez itsasoarekin lotuta daude. Gazteentzako bilduma batean argitaratuta agertzen da liburua eta honek obra zenbait puntutan baldintzatu egiten duela ematen du, batzutan gehiegizko azalpenak ematen baitira. Dena den, azalpen horiek itsasoko hiztegi bereziari dagozkionean, eskergarriak izaten dira, irakurleak ez baitu gaiaren haria galtzen hiztegietara eta joz. Horrek, ordea, ez du esan nahi helduek ere ez dutela hango istorioekin gozatuko: Ahozko tradizioa (edo tradiziotzat ematen zaiguna) oso ondo jasotzen du eta testuko maila desberdinak, kontakizunen markoa, kondairak eta historia bera ere, ederki josita daude, irakurleari liburu interesgarri bat eskainiz.