susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Dedukzioaren maisua | Barrokoaren eta klasikotasunaren oreka »

Ipuin gogoangarriak. Antologia / Askoren artean / Erein, 1997

Ipuin gogoangarriak Javier Rojo / El Correo, 1997-07-31

Ipuin gogoangarrien antologia bat eskaintzen digu Iñaki Aldekoak liburu honetan. Egia esan, antologia guztiekin gertatu ohi den bezala, nork bere aukera berezia egingo luke, izen bat gaineratuz edo baten bat kenduz. Antologoaren zoritxarra, nonbait, berarekin ezin osoro ados egotea. Antologia honetan agertzen diren idazleak XIX eta XX. mendekoak dira, denak maisuak ipuinak idazteko langintzan. Agertzen direnen izen batzuk besterik ez gogoratzearren (guztira hamahiru dira) hauek aipa daitezke: Dickens, Maupassant, Schwob, Txekhov, Kafka, Borges… Nire ustez falta direnen artean Hoffmann egongo litzateke. Baina, lehen esan bezala, ezin egin daiteke denon gustuko antologia, baldintza hori bete beharko lukeen liburua mugagabe luzatuko baitzen. Honelako ipuinak idaztean narratzailearen benetako balioak frogatzen dira, espazio labur batean, kontakizun osoa burutu ezezik borobildu ere egin behar baitu. Eleberrietan, idazleak nahi adina luza dezake testua, ekintzak eta, behar den neurrian garatuz. Ipuinean ez, ipuinak tentsioa du berezko; ez dauka digresiorako lekurik. Hemen ez dago erdibiderik: huts eginez gero, ipuinak ez du balioko; asmatuz gero, ipuin gogoangarri baten aurrean egongo gara.