« Historia gogoratuz | Idazle gazte bat »

Non dago Basques' Harbour / Koldo Izagirre / Susa, 1997

Pausaleku bila Javier Rojo / El Correo, 1997-08-28

Beti iruditu zait Koldo Izagirreren literaturan behin eta berriro gai berberak errepikatzen direla, era ia obsesibo batean, egileari bere literaturan mamu hauei ihes egitea ezinezko gertatuko balitzaio bezala. Liburu honetan horren erakuspidea aurkitu dezakegu. Hasieran umearen ikuspegia hartuta, itsas portuko munduan oinarritzen da bere poesia egiteko, itsasoak eskaini ditzakeen elementuak aprobetxatuz. Hortaz, bere poemetan zehar, marinelak, piratak, naufragoak… agertzen zaizkigu behin eta berriro, eta baita garai batean Espainian egon zen gerra zibilaren aipamena ere, ritornello gisa errepikatzen dena, gerra oraindik bukatu ez bailitzan. Batzutan poeta pertsonaia batzuen atzean ezkutatzen da, bere ahotsarekin ezin esan dezakeena besteren ahotsean aurkitzeko asmoz edo. Eta, gehienetan bertso librearen joera duen arren, ez dio muzin egiten kopla itxurako poemak egiteari. Etsipen eta nekezko tonua nabaritzen zaio liburu honi. Eta badirudi etsipen eta neke horien ondorioz idazlea errealitatean ezin aurki daitekeen ametsezko pausaleku baten bila doala bere poesiarekin, errealitatea dagoeneko estua zaiolakoan. Eta, agian, ametsezko pausaleku hau klabe politikoan ere ulertu beharko litzateke.