susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Poeta gaztearen begiak | Pausaleku bila »

Domiku Garat. Biltzarraren defendatzaile / Isidoro Fagoaga / Erein, 1997

Historia gogoratuz Javier Rojo / El Correo, 1997-08-21

Liburu hau triangelu batek osatzen du; bere erpinak hauexek lirateke: Isidoro Fagoaga, egilea, Domiku Garat, biografiatua, eta Yon Etxaide, itzultzailea. Egilearen asmoa Garat deitura zuten hiru pertsonaia garrantzitsuei biografia bana eskaintzea zen, trilogia egiteko. Alde batetik Domiku eta Josepe anaien eginkizuna aztertu nahi zuen XVIII. mende bukaeran eta XIX. mende hasieran Frantziako eta Ipar Euskal Herriko politikan. Bestaldetik, Piarres, Domikuren semea, bere garaian kantari ospetsua izan zena, izango zuen aztergai. Hemen Domikuri eskainitako atala dugu. Frantziako Iraultzaren garaian Domiku Garaten ekintza politikoa erakusten digu egileak, pertsonaia berezi honen irudia berreskuratuz, historiak bizitzari zenbait erakuspide interesgarri eman ahal dizkiolakoan. Ezen Domiku Garat aipatutako urte horietan aritu zen politikan Lapurdiko Biltzarra defendatzen, iraultzaren asmo zentralisten kontra, baina iraultzaren printzipoei uko egin gabe, Biltzar horretan gauzatuak ikusten baitzituen demokraziaren ideia nagusiak. Hauxe azpimarratu nahi digu behin eta berriro egileak. Itzulpenaz bakarrik esan dezadan Yon Etxaideren lana zehatz eta doia dela, beti bezala. Historia gogoko duenak liburu polita dauka hemen.