susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Berandu baino lehen | Idazteko grinaz »

Orain / Itxaro Borda / Susa, 1998

Bidaiaren kronika Javier Rojo / El Correo, 1998-09-09

Itxaro Bordak poema liburu honetan hiru poesia multzo bildu ditu, desberdinak, alde batetik, batez ere metrikari erreparatzen badiogu, baina egituraz eta tonuz ondo uztartutako asmoan bat egiten dutenak. Hiruretatik bitxiena, garrantzitsuena ere bai nire iritziz, bigarrena da. Prosazko atal laburrez osatutako zati hau liburuko luzeena da eta erdigunearen toki pribilejiatua bere dauka. Bidaia baten kronika bailitzan irakur daiteke liburu hau, eta hori burutzeko idazleak idazkera zuzena, askotan narraziotik oso hurbil dagoena, erabili du. Bidaia horretan, mintzo zaigun pertsonaiak (batzutan lehenengo pertsona erabiliz, bestetan hirugarren pertsonaren atzean izkutatuz, noizean behin “gu” baten laguntzarekin irakurlea bere bidaian inplikatuz) leku bat bilatzen du mundu honetan, berea eta askatasunezkoa. Bide horretan bakardadearekin egingo du topo, eta edonon deserria izango du zain. Beste maila batean, bidaia horretan, euskaldun izan eta sentitzen denaren patua ere ikus daiteke, bere herrian bertan arrotz, bizirik irauteko aukera bakarra hitzari eustea duelarik. Hitz gutxitan, poema liburu hau interesgarria da, eta “Paris, Texas” filmeari (eta ondorioz, Sam Sheparden idazkiei) zordun bada ere, ez du datu hau izkutatzen.