susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Poesiarik gabe bada maitasunik? | Mugak gaindituz »

Tentazioak / Jasone Osoro / Elkarlanean, 1998

Tentazio bitxiak Javier Rojo / El Correo, 1999-03-31

Jasone Osoro azken urte hauetan euskal literaturaren munduan sartu den idazle berri eta gaztearen izena da. Bere lehen literatur liburuak Tentazioak du izena eta hogeita bost kontakizunek osatzen dute. Osororen kontamoldea, nire ustez, oso argia da: arrunta dirudien egoera bat planteatu ondoren, oreka apurtzen duen elementu bitxi bat sartzen du han. Gauzak horrela, elementu bitxi horrek ezusteko amaiera batera eramango du egoera. Gaiak, bestaldetik, desioaren inguruan aritzen dira, eta desioetan desioena (nolabait esateko), sexua edo honen aldaeratzat har daitezkeenak. Liburu hau hitz bakar batean definituz gero, nik irakurgarria dela esango nuke: narrazioak ia beti dibertigarriak dira eta idazkerak ez dio inolako oztoporik jartzen irakurleari. Baina kontakizun guztiak jarraian irakurtzekotan, agian piskat astun suerta liteke. Hainbeste aldiz errepikatzen dira halako ezusteko amaierak, non irakurleari azkenean ezer ez baitzaio ezusteko iruditzen. Beraz, aldika irakurtzea komenigarriago. Idazlearen asmoak ez dirudi idazlan handi eta garrantzitsu bat egitea denik, denbora pasako jostailua eskaintzea baizik. Eta ikuspuntu honetatik begiratuta, Jasone Osororen liburuak oso ondo betetzen du bere funtzioa.