susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Falta izan dugun idazlea | Egiaren gezia »

Ibaia euri-erasotan bezala / Jose Luis Padrón Plazaola / Euskaltzaindia - BBK, 1999

Amodiozko poemak Javier Rojo / El Correo, 1999-07-14

Jose Luis Padrón Plazaola poeta gazteak (1970.ean jaio baita, eta, badakizue, idazlearen helduaroa berrogei urte betetzean hasten da) 1998.eko Felipe Arrese Beitia saria irabazi zuen poema liburu honekin. Gaia dela-eta, Padrónek poesiari beti egotzi zaion gairik unibertsalena hautatu du: izan ere, berea amodiozko poesia baita, amodioak sortzen duen osotasunaren inguruan dihardu-eta. Bi osagai kontrajartzen ditu poemetan, amodioa bera eta denbora. Denborak ukitzen duen guztia desegiten den bitartean, amodioak ukitutakoak iraun egiten du. Baliabide poetikoei erreparatuz gero, iruditzen zait poesia hau erosotasun teknikoan oinarritzen dela. Naturalezari buruzko erreferentzia metaforikoak, paralelismo eta errepikapenetan finkatutako bertsifikazioa… Hau da, ohikoak diren osagaiak poema politak egiteko. Gauzak honela, ni naizen irakurle honek behin eta berriro irakurritako poesiaren itxura hartu diot liburu honi. Poesia mota honetan eroso aurkitzen da idazlea, eta badirudi ez duela gogorik beste bide batzuk, malkartsuagoak baina interesgarriagoak, urratzeko. Edonola ere poesia eta postromantizismoa parekatzen dituen irakurleari oso atsegina irudituko zaio liburua, idazlea, dudarik gabe, oso trebea baita.