Esku bakarrarekin irakurtzeko kontuak / Pilar Cristobal / Txalaparta, 1999

Ipuin erotikoak Javier Rojo / El Correo, 1999-08-11

Esku bakarrarekin irakurtzeko kontuak izenarekin bataiatu dute Pilar Cristobal-en narrazio bildumaren euskal itzulpena. Irakurleak izen hori irakurri eta liburua literatura erotikoaren esparruan sartzen dela jakinaren gainean egonda, nekez esan dezake aurreikuspenak zapuztuta geratu zaizkiola. Izan ere, liburu honek narrazio itxurapean fantasia erotikoen bilduma baino ez du eskaintzen. Gauzak honela, zaila da honelako liburu baten balio literarioez hitz egitea, liburu honek, azken finean, ez baitu literatur baliorik erakusteko inolako asmorik. Narrazioen argumentuek, esaterako, fantasia erotiko horietarako marko txikia ematen digute, fantasia horien deskribapena delarik liburuaren osagai nagusia. Ezin uka, bestaldetik, idazleak oso ondo ezagutzen duela osagai nagusi hori, sexologian aditua den aldetik. Edozein narrazio liburuk eduki behar duen beste osagaiak, ordea, literaturak alegia, egiten du huts hemen. Gai batean aditua izateak ez du esan nahi gai horri buruz literatura egiteko gai denik, honetarako literaturan ere aditua izan behar baita. Narrazio erotiko hauetan idazleak alderdi erotikoa nabarmendu nahi izan du, alderdi narratiboaren kaltetan. Literatura bilatzen duenak kontuan hartu beharreko puntua.