susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Karlistaldia | Maitasun-paisajea »

Hollywood eta biok / Javi Cillero / Alberdania, 1999

Narrazio sotila Javier Rojo / El Correo, 1999-08-18

Javi Cillero-ren liburuak isiltasunean ondo egindako lanaren adibidetzat har ditzakegu. Bagenekien gure artean dagoen itzultzailerik hoberenetakoa zela. Hainbat liburu dira honen froga. Baina orain, zalaparta handirik gabe, etengabeko lanean arituta, sorkuntza lanean ere interes osoa merezi duen idazlea dela frogatu digu. Hollywood eta biok narrazio liburua da. Gehienak oso narrazio laburrak dira, eskemak, irudiak, ia-ia narrazio proposamenak, soilak eta sotilak. Batzutan bi orrialde baino gutxiago duten narrazio hauetan, idazleak errealitatearen tolesduretan dauden zirrikitu beltzak erakustea lortzen du. Hau da, normalak diruditen egoeretan agertzen diren alderdi siniestroak nabarmentzeko gaitasuna erakutsi du liburu honetan. Honetarako, estilizazioa du bidelagun, teknika-estiloetan. Honelako narrazio laburretan funtsezkoena baino ez zaigu kontatzen, zeharkako itzulinguruetan galtzen ez den estilo zuzen baten bidez. Edonola ere, idazleak pertsonaiak edo egoerak gehiago garatu behar dituela ikusten duenean inolako oztoporik gabe gai da berrogei orrialdeko narrazioa egiteko, laburragoetan erakutsitako trebezia berberarekin. Adibide bat besterik ez aipatzeagatik, hor dago “Ez duzu ene aurpegia sekulan ahaztuko”.