susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Euskara, aberria eta beste… | Gerra elegantea »

Gerezi denbora / Inazio Mujika Iraola / Alberdania, 1999

Gerra garaia Javier Rojo / El Correo, 1999-12-22

Gerezi denbora-n Inazio Mujikak Espainiako Gerra Zibilean kokatutako ekintza bitxiak kontatu dizkigu. Egoera tragiko batean, gerran alegia, gauzarik arraroenak eta ezustekoenak gerta daitezkeelarik, gerra ironiarako marko ezin hobea bihurtzen zaigu. Honetan, adibidez, anarkista batek apaiz bati lagunduko dio beste anarkista batzuek atxilotuta duten artzapezpikua askatzen. Eleberria oso interesgarria da eta ekintzak zalu kontatuta daude, irakurleak istorioa hasi eta buka irakurtzeko moduan. Testua, bestaldetik, kapitulo laburrez osatuta dago eta bakoitza, atalka argitaratutako istorioek gogora ekartzen duten teknika erabiliz, ezusteko batekin bukatzen da, hurrengoaren atea irekiz. Baina, gauza hauek guztiak eleberri honen aldeko argudioak diren neurri berberean, nobelaren mugak ere izan daitezke. Izan ere, gerran girotutako abentura hau kontatzerakoan, ekintzen azalean gelditu da idazlea, gertaerek eduki ditzaketen hausnarketarako balioak ahaztu balitu bezala. Eskaintzen duena, hala ere, bikain eginda dago eta oraingo honetan idazleak egin digun denbora pasa ederrarekin konformatu behar. Egia esan, euskal irakurle gizajoek batzutan sufritu behar izaten dutena ikusita, ez gutxi.