susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Euskal odola | Adio errua »

Dublindarrak / James Joyce / Alberdania, 1999

Hiri hila Javier Rojo / El Correo, 2000-02-09

James Joyceren Dublindarrak argitaratu berria du Alberdania etxeak Irene Aldasororen itzulpenean. Hamabost kontakizunek osatzen dute Irlandako idazlearen lan ezaguna, gaur egun klasiko bihurtu dena. Eta hamabost kontakizun horietan XX. mendearen hasierako gizartearen ikuspegi osoa eskaintzen digu. Ia-ia hilerria dirudien hiri batean hara-hona ibiltzen diren pertsonaia arruntak ditugu protagonistak, nork bere ilusio txikia, nork bere helburu ziztrina erakusten digularik. Zeren gizarte horren alde desberdinak erakustean, Joycek idazle gutxik lortu dutena erdietsi baitu: zatiok ederto lotu eta gizarte osoaren deskribapen zehatza eta gardena. Giroa iluna da, ilusio xumeen mundu itxia, ia bizitasunik gabea. Gelditasun sentimendu hau bikain islatuta dago Joyceren kontakizunotan. Izan ere, idazleak erakusten digun mundua izozturik bezala agertzen zaio irakurleari. Kontatzen denaren txikitasunak harritzen du zenbaitetan, mundu izoztu horretan ezer gertatuko ez balitz bezala. Honez gainera, askotan kontakizunak istorioaren edozein puntutan bukatzen direla dirudi, bizitza puska batzuen aurrean gaudelako inpresioa areagotuz. Idazle bikain baten eskuetan edozein gaik balio du literatur lan miresgarria sor dadin.