susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Iraultza nahiaren hitzak | Gezimina »

Ene Ondarru / Andoni Basterretxea / Auspoa-Sendoa, 2000

Ondarru Javier Rojo / El Correo, 2000-10-18

Ene Ondarru izenpean Andoni Basterretxearen zenbait idazki bildu dira, kostaldeko herri hori ardatz eta gune dutenak. Gazte garaiko oroitzapenak, narrazioak, bertsoak, umeei zuzendutako testuren bat aurki ditzake irakurleak orrialde horietan. Bertsoek, adibidez, liburu erdia osatzen dute eta neurri handi batean Orixek Euskaldunak poema luzean egin nahi izan zuena gogora ekartzen dute: herri baten (kasu honetan, marinelen herri baten) bizitza tradizionalaren bilduma. Bertsook, edonola ere, ez dute Orixek lortutako maila iristen. Narrazioak bi sailetan agertzen zaizkigu. Batzuk (“Sorgin kontuak” izena dutenak) ahozko tradiziotik hartuta daude eta, dirudienez, jaso bezala plazaratzen dira. Hauetan irakurleak ahozko kontakizunen xarma berezia aurkituko du, eta Ondarruko euskara biziaren adibide interesgarria. Beste kontakizunak “Gertaerak” izeneko atalean agertzen dira eta, nire ustez, literaturaren ikuspuntutik zatirik interesgarriena, laburregia tamalez, osatzen dute, Andoni Basterretxea kontalari trebea dela erakusten baitute. Liburu honetan gaztaroan ezagututako herriaren memoriari eutsi nahi dio idazleak eta, alde honetatik, testigantza bat eskaintzea da garrantzitsuena, literatur balioen gainetik.