susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Arria! | Ezberdintasuna »

Bidaiak scriptoriumean zehar / Paul Auster (Oskar Arana) / Alberdania, 2007

Nobela harrigarria Javier Rojo / El Correo, 2007-01-28

Antza denez, Alberdania argitaletxeak erabaki du Paul Austerren liburuak agertu ahala euskarazko bertsioan eskaintzea. Normalizazio egoera baterantz hurbiltzen ari garen seinale. Beraz, “Bidaiak scriptoriumean zehar”, idazle amerikarraren azken nobela, eskuragai dugu orain. Austerren ibilbidea ezagutzen duen irakurleari testu hau harrigarria gertatuko zaio, ez baitu antz handirik idazleak orain arte eskaini izan dituen nobelekin. Zerbait gogora ekartzen badu, agian “Azken gauzetako lurraldea” izan liteke. Protagonista bitxia aurkezten zaigu: orainaldi absolutuan bizi den pertsonaia, gela batean giltzapetuta daukatena. Pertsonaia honek oroimenean aurkitzen dituen apurrekin eraiki nahi du bere izaera, bere buruari buruzko narrazio koherente bat osatzeko. Idazgintzaren parabola, alegia. Argumentuaren aldetik absurdoaren literaturatik hurbil dagoela esan daiteke, Kafkaren mundutik ere zerbait hartu duelarik. Baina pertsonaia horrek gelan dituen izkribu batzuetan kontatzen dena kontuan hartuta, alegoria politiko baten aurrean gaudela ere esan liteke. Edonola ere, irakurketa anitz duen testua, maitatu edo gorrotatu egiten diren horietakoa, indiferente uzten ez dutenetakoa.