« Bide ertzeko printzak | Adimenaren jokoa »

Kutsidazu, berriz, Ixabel / Joxean Sagastizabal / Alberdania, 2006

Kutsidazu, berriz, Ixabel M. Egimendi / Aizu!, 2007-02

Berriz etorri zaizkigu liburu formatuan Ixabel eta Juan Martin, euskal giroko bikote ezagunenetako bat. 1994an osatu zuten bikotea Kutsidazu bidea, Ixabel eleberriaren orrialdeetan, eta harrezkero neska baserritarrak eta mutil kalekumeak gorputza eta aurpegia ere izan dute antzerkia eta zinemari esker. Lehenengo eleberri hura barre algaraka irakurri ondoren, gauza bera gertatu zitzaigun istorioa antzoki eta zinema aretoetan ikusi genuenean.

Eta irri egiten jarraitzeko asmoz jaso dugu pozik bigarren eleberria. Honekin ere egiten da barre, baina agian zerbait gehiago espero zitekeen, bigarren eleberri hau lehenengoa bezala bukatzen baita ia-ia, Juan Martinen udaldia pixka bat luzatu eta Donostiarako bidean jartzen denean, alegia. Hau da, istorioak ez du aurrera egiten, eta irakurlea Ixabel Donostiara ikastera joaten denean gertatuko denaren zain geratzen da berriro ere, aurreko nobelaren bukaeran bezala. Amaiera hau, gainera, oso irekia da, badirudi Sagastizabalen burutik behintzat pasatu egin dela bikote honen komeriekin trilogia bat osatzea. Egingo balu, gustura hartuko genuke, baina horrek nobela ezberdin bat eskatuko luke, baserri giroa utzi eta hirirako jauzia egingo lukeena, pertsonaia berri eta guzti. Dena dela, Juan Martin ere berria izango litzateke kasu horretan eta, agian, ez hain dibertigarria.