susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Txintxo-txintxo | Hitzen ondoeza »

Literaturak umeei begiratu zienean / Manu Lopez Gaseni / Pamiela, 2006

Haur literaturaz Javier Rojo / El Correo, 2006-12-27

Manu Lopez Gaseni idazle eta ikertzaileak saiakera interesgarria eskaintzen dio haur eta gazte literaturaz arduratzen direnei. “Literaturak umeei begiratu zienean” du izenburua, eta argi azaltzen du, neurri batean behintzat, zein izan den idazlearen planteamendua. Izan ere, literaturak ezin dio utzi bere literaturtasuna aldarrikatzeari haur eta gazteentzat idazten denean, haur literaturaren barruan literatura bera hausten duen era bateko edo besteko instrumentalizazioaren arriskuarekin topatzen baikara behin eta berriro. Hauxe da arazorik garrantzitsuenetako bat, literaturaren izenpean bestelako testuak eskaintzen baitira, gehienetan asmo didaktikoz egindako testuak. Lopez Gasenik haur eta gazte literaturaren erronka nagusiak planteatzen ditu saiakeran, eta era kritiko batez azaltzen du bere iritzia. Idazleak kontraesanak plazaratzen ditu, ohikoaren kontra zeren gure artean, itsuarena eginez edo, kopuru hutsei begira egoeraren baikortasuna aipatzen baita, alderdirik eztabaidagarrienak saihestuz. Zer pentsatu asko ematen duen liburua idatzi du Lopez Gasenik.