susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Mihisearen alde bietako irudiak | Izuaren baitan »

Iparraldean gaindi / Joseba Aurkenerena / Gero, 2006

Iparralde tipikoa Javier Rojo / El Correo, 2006-09-27

Joseba Aurkenerena Barandiaran 2003an argitaratutako “Iparraldeko kronikak” liburuaren egilea dugu. Orain bide berberari jarraituz, “Iparraldean gaindi” izeneko idazlana plazaratzen du. Esan bezala, bide beretik doa liburua: idazle batzuek urtekariak idazteko joera duten moduan, Joseba Aurkenerenak Ipar Euskal Herriaren berri eman nahi du, kronikaren itxurapean. Aurreko liburua ezagutu gabe ere, liburu honen hasieran agertzen den eskaintzak ematen dio irakurleari nahiko zantzu, bertan aurkituko duenari buruz. Euskara eta euskal nortasunaren alde ari direnei eskaintzen die idazlana, sustraietan geroaren funtsa aurkitzen delakoan. Liburuan agertzen zaiguna Ipar Euskal Herriko errealitatearen azalpena da, baina errealitate hau “tipikoa” den aldetik; bereizgarri. Beste guztia isilduta gelditzen da orrialde horietan. Ondorioz, folklorearekin lotutako errealitate baten deskripzioa ematen zaigu idazlanean, esentzialismoarekin lotutako euskaltasun baten aldarrikapen sutsua. Eta liburuan zehar hor-hemen agertzen diren argazkiek eta irudiek itxura hau handitu egiten dute. Euskal indigenismoaren zaleentzat liburu egokia izan daiteke beren ideietan sendotzeko.