Auzoak / Urtzi Urrutikoetxea / Susa, 2005

Hiriaren mosaikoa Javier Rojo / El Correo, 2005-08-03

“Auzoak”, Urtzi Urrutikoetxeak idatzitako liburu hau, nobelatzat har daiteke, hari narratiborik gabeko nobelatzat hain zuzen, nobela oso genero malgua den aldetik. Ia erlaziorik gabeko zati desberdinez osatutako liburua dugu, non pertsonaia batzuk ikusten ditugun beren eguneroko bizitzan. Halako mosaiko bat plazaratuta, Bilbo hiriaren irudia eman nahi izan du idazleak, hirian milaka istorio desberdin baitaude, askotan espazio berberean kokatuta, baina elkarrekin topatu gabe. Irudi hau ematerakoan benetan liburu interesgarria eskaini du Urrutikotxeak, estiloaren aldetik ere aipagarria iruditzen zaidana. Baina badu beste puntu interesgarri bat: liburu honetan nahigabe ere agertzen zaigu euskaldunek Bilborekin duten harreman kontraesankorraren isla. Euskaldunen hiria proletarioen hiria da, auzo marjinatuen hiria, Gabriel Arestiren poesian agertzen zen hiri berbera, denborak honetan inolako aldaketarik ekarri ez balu bezala.