kritiken hemeroteka

8.535 kritika

« | »

Bihotz gosetien kluba / Xabier Mendiguren Elizegi / Elkar, 2005

Bihotz goseti galdua Iñaki Mendizabal / Deia, 2005-06-14

Urteak daramatza Xabier Mendiguren Elizegik bere nerabezaro eta gaztaroko pasadizuak kitatu guran. Liburu sorta txinpartatsua osatu du horren inguruan, eta badirudi gainezka egin diola txanbilak, kontatzeko zer edo zer utziko zuen arren (enegarreneràko utzi ere, seguruenik). Kieto egoteko botikarik ezagutzen ez duen editore eta idazle hau antzerkian ere murgildu da azken aldian, eta horrez gain blog zirikatzailea betetzen saiatzen da, egunero-egunero, sarean. Badu etorria bai beasaindarrak.

Orain fikziora bueltatu dela dio berak, eta nik, fikzioa baino egiazko fikzioa ikusten dut liburu berri honetan, sinesgarritasun handiko kontakizunak ondu dituelako idazleak, behin edo behin horrelako egoeratan ikusi dugulako geure burua, eguneroko desertu populatuan galduta, eguneroko txikikerietan nahastuta, bai, baina beti zer edo zer bilatzen, laguntasuna, kidetasuna, konplizitatea, ulermena, edo bat-bateko sexu astinaldia, “heriotza txikia”, egileak “Heidi” ipuin luzean agertzen duen legez. Eta, hala ere, bihotza ezin ase, bihotz gosetia, bihotz ehiztaria, bihotz bakarti eta xurgatzailea. Hori da ipuinen abiapuntua: insatisfakzioa.

Noragabetasuna da ipuinetan suma daitekeen beste aspektu bat, hau da, bihotz aseezinen kokatu ezina, eta egoera horren kontzientzia izatea. Neurri baten, esango nuke goseak baino noragabeak berak galtzen dituela pertsonaiak, eta beraien tragedia txikiak puztu egiten dituela ez kolokazio horrek, zer nahi duten ere ez dakitela dabiltzalako. Edo, agian, beste barik, noragabetasuna eta aseezintasuna bidelagunak direla, elkarri xaxaka dabiltzan bidaideak, edonor izorratzeko gai direla.

Baina hau guztia irakurrita ez dezala pentsa irakurleak istorio triste eta txaposoak ondu dituenik Mendigurenek, malenkonia ttantta bat duten arren. Umorea abileziaz erabiltzen du idazleak, han-hemenka, eta pertsonaiekin jolasten du, batzuetan beraiekin bat eginez (beraien jokaera konprenituko balu legez), bestetsuetan lepotik barre eginez (barregarri utziz, egoera muturrekoetan sartuz). Gabonetan larrialdiko miraria espero duen albaitaria, lankide bat bere sarera biltzeko estrategiak lantzen dituen telebista-produktorea, mutilarengana doala harekin segitu nahi duen galdezka doan emakumea, tabernero bakarti eta gutxiestua, lanean ligatu ezinda dabilen astakirtena… Galeria bitxia eta interesgarria, edonola ere.

Bost ipuinak dira gazi-gozoak eta amaiera irekia dute ia gehienak. Estilo aldetik Mendigurenen betiko lerroa nabarmentzen da kontakizunotan: erritmoa, ulergarritasuna eta umorea. “Bihotz gosetien kluba”, beti galdatan dagoen geure barruari begiratzeko beste ispilu bat.

Azken kritikak

Kontra
Ane Zubeldia Magriñá

Jon Jimenez

Simulakro bat
Leire Ugadi

Maddi Galdos Areta

Kontra
Ane Zubeldia Magriñá

Paloma Rodriguez-Miñambres

Patrizioak eta plebeioak
Kepa Altonaga

Mikel Asurmendi

Turismo hutsala
Fito Rodriguez

Asel Luzarraga

Zoriona, edo antzeko zerbait
Karmele Mitxelena

Ainhoa Aldazabal Gallastegui

Pleibak
Miren Amuriza

Mikel Asurmendi

Izena eta izana
Jon Gerediaga

Asier Urkiza

Amok
Stefan Zweig

Nagore Fernandez

Auzo madarikatua
Felix Urabayen

Jon Jimenez

Lur jota Parisen eta Londresen
George Orwell

Amaia Alvarez Uria

Olatuak sutzen direnean
Haritz Larrañaga

Joxe Aldasoro

Bisita
Mikel Pagadi

Mikel Asurmendi

Lur jota Parisen eta Londresen
George Orwell

Asier Urkiza

Artxiboa

2025(e)ko uztaila

2025(e)ko ekaina

2025(e)ko maiatza

2025(e)ko apirila

2025(e)ko martxoa

2025(e)ko otsaila

2025(e)ko urtarrila

2024(e)ko abendua

2024(e)ko azaroa

2024(e)ko urria

2024(e)ko iraila

2024(e)ko abuztua

Hedabideak