« Hirugarren eta azken deskarga | Planeta ezberdinetako sateliteak »

Itxoidazu Café de Passy-n / Xabier Etxeberria / Martin Etxeberria / Elkar, 2004

Bidaia paraleloak Javier Rojo / El Correo, 2004-12-29

Xabier eta Martin Etxeberria anaia bikiek liburu bat idatzi dute elkarlanean. Nobela da eta “Itxoidazu Café de Passy-n” izenburua du.Bertan kontatzen da nola Xabier eta Martin deitzen diren bi anaia bikiek bidaia bat egiten dute Parisera nobela bat idazteko. Auto-fikzioaren jolasean parte hartzeko gonbitea da, jakina. Baina autofikzioarekin batera, metafikzioa ere aurki dezakegu liburu honetan, zeren nobela bat idazteko asmoz Parisera egiten duten bidaiarekin batera beste istorio bat kontatzen baitzaigu: idazle bidaiariek idatzitako nobela. Idazleen bidaia menturatsua (nobela bukaeran zentzua izango duten abentura ulertezinak gertatzen zaizkie) eta beraien pertsonaien istorioa (70eko hamarkadaren hasieran Parisen ikasten duten euskaldun batzuen gorabeherak) paraleloan kontatzen dira, eta bi hari hauen artean harreman zuzenik ez badago ere, irakurtzean nahi gabe ere bien arteko loturaren bat eraikitzen saiatzen da. Nobelak, nire ustez, pazientzia pixka bat eskatzen dio irakurleari. Izan ere, hasieran artifizialki hanpatutako testua dela dirudi, baina aurrera joan ahala, nobela interesgarria gertatzen da eta, batzuetan, dibertigarria ere bai… pertsonaiek “Ez adiorik” eta “Betiko loa” nahastu arren.