susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Kurduen tragedia | Etimologia filologia ez denean »

Begiz jotako ipuinak / Askoren artean / COF, 2003

Ikustekoak Felipe Juaristi / El Diario Vasco, 2004-10-22

Badira ideia on batzuk (batzuk baino gehiago, dena esan behar bada), gero gauzatzerakoan zorte handirik ez dutenak. Esaterako liburu hau, itxuraz ederra da oso, bai kanpoko aldetik bai barnetik. Niri hala iruditzen zait, baina badakit badela jendea halakorik onartuko ez duenik, baina, jakina, denetik egon behar du mundu honetan, gazitik eta gozotik, onetik eta gaiztotik, denetik.

Ideia, esan bezala, zoragarria iruditzen zait (zenbat aldiz erabili ote dudan iritzi aditza, izan ere, iritzi-artikulua idazten ari naizela ematen du), begiz jotako ipuinak. Argazkilari batzuen lanak hartu eta zenbait idazlek lan horren inguruan testu bana idatzi dute, ipuin tankeran, edo ipuin antzean, ez baita gauza bera tankerakoa eta antzekoa. Artistak honako hauek dira: William Eggleston, Gabriele Basilico, Javier Vallhonrat, Frank Thiel, Candida Höffer, Nan Goldin, Gonzalo Puch, Xavier Ribas, Hannbah Collins, Andreas Gursky, Elena del Rivero (oso gustukoa dut artista hau, New York zegoen 11-Skoa gertatu zenean, oso gertu gainera), Tacita Dean, Koel-Peter Wilkin, Joan Fontcuberta, Esko Männikö..

Idazleak hauek dira: Lourdes Oñederra, Koldo izagirre, Harkaitz Cano, Anjel Lertxundi, Ramon Saizarbitoria, Juan Garzia, Arantxa Iturbe, Xabier Montoia, Jon Alonso, Iban Zaldua, Unai Elorriaga, Inazio Mujika, Edorta Jimenez, Aurelia Arkotxa eta Joseba Sarrionandia.

Ideia berez ona izan arren, ez dut uste liburuak arrakasta handirik izan duenik. Niri, zinegotzi batek eman dit liburua, eta eskertu egin diot, nitaz gogoratu delako, ez beste batzuk bezala. Liburu piloa zeukan gordeta eta lastima da, txukuna baita oso.