kritiken hemeroteka

6.959 kritika

Azken kritikak

« | »

Maitagarrien liburuetan sinesten zuen printzesa / Marcia Grad Powers (Usoa Wyssenbach) / Igela, 2011

Badira ipuinak asmatzeke, oraindik Iratxe Esnaola / Berria, 2012-03-11

Marcia Grad Powers Jokabide Emozional Arrazionalaren bidezko terapia hezitzailea da, ezaguna autolaguntzaren eta motibazioaren alorretan egiten duen lanagatik. Liburu ugari idatzi ditu, literatur best-seller-ak tartean, esku artean dugun hau adibide. Hezkuntzaren edo psikologiaren alor profesionaletik ez eta literaturatik heldu arren liburuari, ezin uka irakaspen edo laguntza-liburu izateko xedeaz idatzia izan dela. Maitagarri ipuin klasikoek dioten modura, behin batean bazen printzesa ilehori bat maitagarri ipuinetan sinesten zuena, On Kixotek zaldun liburuetan bezala. Emakumez emakume eta belaunaldiz belaunaldi erakutsi zitzaion Printzearen zain behar zuela egon, eta hark beteko ziola existentzia osoa, hots, emakumearen, emakumetasunaren eta edertasunaren ideia hegemonikoa eta haren iruditeria txertatu zioten. Printzesen Sentipenen eta Portaeraren Errege kodeari jarraituz, genero eraikuntza arau emailea lagun izan zuen, eta Errege Familiaren Mapa tradizioaren oinarri. Printzesa pasiboa maitasun erromantikoaren topikoan hezia izan zen, eta autoritate familiarraren mendean.

Jasotako herentzia kaltegarri horretaz jabetzea eta askabidera ekindako bidaia dira eleberriaren mamia. Horretarako, fantasiazko ipuinen baliabideak darabiltza errealitate gordinaren metaforatzat: Sorginkeria (tratu txar eragilearen justifikagarri); Lagun Asmatua (elkarrizketa beharraren adierazle); Animalia pertsonifikatuak (bizitzako maisu edo aholku emaile moduan). Lau atal ditu liburuak, baina bi zatitan bana daiteke, istorioari dagokionez. Aurrena, haurtzaroa, ezkontza eta senarrarekiko harremana biltzen dituena. Maitemintzen den eta tratu txar psikologikoa jasan arren bertatik nola askatu ez dakien emaztearen nora eza kontatzen da. Bikaina da tratu txarren eboluzioaren deskribapena; bai biktimaren erantzunak, eta bai erasotzailearen jarreren azalpena. Bigarren zatia ikasitako guztia atzean uzten eta libre izaten saiatzeko bidaia bat da. Abstraktuagoa da, eta narrazio literarioa eta irakaspena ez doaz hain eskutik helduta. Aholkuak emateko aitzakia gisa ikus daiteke inoizka kontakizuna. Aholku gehitxo pilatzen direla irudituko zaio inori, nahiz eta aholkuak erabilgarriak izan. Eskarmentuak jasotzeko atala da, barrutik haztea eta gogo-bihotzen arakatzea helburu dituena. Norbere burua zaintzen eta maitatzen ikasteko moduan sakondu nahi du. Egia ezagutzeko bidean eta besteengana lotzen gaituzten harremanetan.

Narrazioan zehar Printzesak barruan duen lagun ikusezinak garrantzi handia du. Printzesari hezkuntzaren bidez inposatu diotenari errebelatzen zaion ahotsa da. Hari errietan hasten zaionean Printzesa, esaterako, jaso dugun hezkuntzaren indarkeria guk geuk nola erreproduzitu ahal dugun islatzen du. Ipuin klasikoen berridazketa eta ipuin berrien perspektiba anitza geroz eta fenomeno zabalduagoa da, helduontzako irakurketan, behinik behin. Nunila Lopez eta Miryam Cameros Sierraren La cenicienta que no quería comer perdices adibide ezaguna da, Interneten zabalpenari esker milaka eta milaka irakurle irabazi dituena ipuin tradiziozkoa hankaz gora ipiniz. Egungo hezkuntzan eta jendartean, oraindik, printzesari (neska izendatuei) atxiki maitasun erromantikoaren ideia zalantzan jartzeko balio duten erreferentziak dira narrazio berriok. Erreferentzia berriak sortzeko balio du liburu honek ere, eta, aldi berean, balore zehatz batzuen zabalpena egiteko. Bidaia orria izan nahi du, bizi-hezibidea.

Azken kritikak

Mundu ikuskerak euskal narratiba garaikidean: modernitatearen krisitik postidentitatearen promesera
Gorka Mercero

Mikel Asurmendi

Biennale
Beatriz Chivite

Peru Iparragirre

Mina edo libertatea!
Kepa Larrea

Javier Rojo

Hodien metafisika
Amelie Nothomb

Amaia Alvarez Uria

Nora goaz euskalduntasun honekin?
Joxe Manuel Odriozola

Joannes Jauregi

Gaizki ulertua
Irene Nemirovski

Aiora Sampedro

Hitzontziak
Xabier Montoia

Iratxe Esparza

Poesia kaiera
Rosalia de Castro

Igor Estankona

Mendi-joak
Aingeru Epaltza

Javier Rojo

Mendi-joak
Aingeru Epaltza

Peru Iparragirre

Gerezi denbora
Inazio Mujika Iraola

Amaia Serrano Mariezkurrena

Eoskola. Heziketa hipermodernoa
Mitxelko Uranga

Javier Rojo

Txoriak dira bederatzi
Tere Irastortza

Aitor Francos

Haizeari begira
Jon Ariza de Miguel

Usoa Alberdi Fernández

Artxiboa

Otsaila 2018

Urtarrila 2018

Abendua 2017

Azaroa 2017

Urria 2017

Iraila 2017

Abuztua 2017

Uztaila 2017

Ekaina 2017

Maiatza 2017

Apirila 2017

Martxoa 2017

Hedabideak