susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Literatura ikusten da hemen behetik | Neurria »

Gertakizuna / Annie Ernaux (Joseba Urteaga) / Igela, 2003

Gertakizuna Ana Unanue / Aizu!, 2004-04

Istorioa: 1963an, artean ikasle gazte zelarik, haurdun gelditu zen Annie Ernaux. Hiru hilabetez, haurdunaldia nola eten izan zen bere obsesio bakarra. Abortua debekatuta zegoenez, klandestinitatera jo behar izan zuen. 35 urte geroago, sekula ahaztuko ez zuen gertakizunaren berri ematen du idazle frantsesak.

Emaitza: testigantza liburu soil eta doia, zenbait pasartetan gordina bezain zirraragarria. Ernauxek sentimentalismorik gabe, baina doitasun handiz islatzen du gaztetan bizi izan zuen irrealitate egoera hura. Desio ez zuen haurdunaldiak hankaz gora jarri zuen bere eguneroko bizimodua, bat-batean beste mundu batean bizi zen (“alde batean beste neskak zeuden, sabela hutsik zutenak, eta bestean, ni”), eta ia laguntzarik gabe atera behar izan zen ataka gaiztotik.

Nabarmentzekoa: egileak 35 urte lehenago jazotako gertaerak izan ziren bezala —hau da, berak bizi izan zituen bezala— kontatzeko egiten duen ahalegina. Kontatu baino gehiago, iraganeko bizipen, sentsazio eta pentsamenduak disekzionatu egiten ditu Ernauxek. Azken batean, memoria liburua da Gertakizuna. “Agian oroimena gauzak amaieraraino begiratzean datza soilik”, dio Yuko Tsushimak liburuan ageri den aipuan. Idazketaren bidez, horixe egiten saiatzen da Ernaux: gertaerak amaieraraino begiratu eta bizitakoari zentzua eman.