susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bada etorkizunik | Poema bilduma »

Ura ez baita beti gardena / Xabi Lasa / Elkar, 2023

Kontuz ibili non sartzen zareten Sara Cabrera / Bilbao, 2024-02

Xabi Lasa Gorraiz (Iruñea, 1967) ate nagusitik sartu da literaturan, Ura ez baita beti gardena argitaratutako lehenengo liburuari esker, irabazitako Irun Hiriko Kutxa Literatura Sariaren 45. edizioak —eleberria kategorian— frogatu duenez. Eta liburua irakurtzen hasten garenean sortzen diren sentsazioek gauza bera baieztatzen dute. Hamaika kapituluk eta 328 orrialdek osatu dute liburua, eta han emozio ugari sentituko ditugu. Thrillerra burokrazia eta joko politikoak nahasten dituen eleberriak Errege Bardeako irudi misteriotsuago bat ere erakutsiko baitigu.

Protagonista Sara Zaldaiz ingeniaria da, Nafarroako Gobernu berriaren uraren antolamendurako arduraduna. Lanarengatik, Erriberako Lurribar herrira joan beharra izango du, ur-horniketan arazoak daudela eta. Elkar argitaletxeak laburbildu duenez, “Udalaren eta laborarien arteko liskarra” da abiapuntua, baina hori gero eta gehiago korapilatuko da: “Enpresarien trikimailuak, alderdi politikoen arteko eztabaidak eta hilketa ilunak ere nahasteraino”.

Egileak thriller batentzako ezohikoa izan daitekeen protagonista aurkeztu digu, ingeniari bat, eta berarekin abentura eta arriskuak ezagutuko ditugu, bertan politikarekin eta urarekin jolastea hilgarria izan daitekeela ikasten dugun bitartean. Sara ez da istorioan bakarrik egongo; lagun leialak ere baditu, eta horietako batzuk, poliziak.

Lasak xehetasun osoz deskribatu ditu kokalekuak, Nafarroan egongo bagina bezala sentiaraziz. Errege Bardeako paisaietan murgilduko gara, bertako herrietan, eta bere herritarrak ezagutuko ditugu, baita Nafarroako Gobernuko kideak eta Lurribarkoak ere: presidentea, presidenteordea, kontseilariak, herriko alkatea… Eta horien eta enpresarien arteko aferen lekuko izango gara kapituluek aurrera egin heinean, polizia gorpuen arteko liskarrak ikuskatzen ditugun bitartean.

Eta Xabier Lasak jakin badaki zeren inguruan idazten duen. Izan ere, nahiz eta Teologia ikasi eta, gaur egun euskara teknikari gisa lan egin, Berriozarko alkatea izan zen 2007tik 2015era bitartean, baita parlamentaria eta nafar Gobernuko kidea ere. Bere bigarren eleberriaren zain geratu beharko gara, Sara eta bere lagunekin zer gertatzen den ezagutzeko grina piztu baitu. bitartean, gogoratu, ura ez da beti gardena, eta egiatzat hartzen duguna ez da beti horrela izan behar.