« Nola hil nahi duzu? Benetako galdera da | Kontuz ibili non sartzen zareten »

Zirriborroak eta gero / Askoren artean / Consonni, 2023

Bada etorkizunik Jose Luis Padron / Bilbao, 2024-02

Zirriborroak eta gero Azala kreazio espazioaren egitasmoa da. Arabako Lasierra herrian kokatutako Azala guneak hiru ardatzetan egiten du lan: ikerketa, prestakuntza eta sorkuntza, betiere praktika artistiko garaikideen testuinguruan.

Zirriborroak eta gero proiektuak hainbat idazle gonbidatzen ditu etorkizuna nolakoa izango den deskribatzen duten testuak idatzi eta, bide horretatik, egungo gizarteak dituen erronkei erantzuna emateko alternatiba literarioak eraiki ditzaten. Proiektua 2019. urtean abiatu zuten; geroztik, hamar izan dira etorkizun posibleei buruzko fabulak sortzera gonbidatu dituzten idazleak, hauek, hain zuzen ere: Katixa Agirre, Harkaitz Cano, Gabriela Damian, Belen Gopegui, Karmele Jaio, Lucia Baskaran, Danele Sarriugarte, Uxue Alberdi, Iban Zaldua eta Patxi Zubizarreta.

Ipuinak osorik irakur ditzakegu proiektuaren webgunean, baita deskargatu eta entzun ere. Orain arteko uzta osorik, lehen hamar fabulak, bildu du Cosonni argitaletxeak izen bereko antologian, bai euskaraz bai gaztelaniaz: Zirriborroak eta gero: Mundu posibleei buruzko istorioak eta fabulazioak / Borradores del Futuro: Historias y fabulaciones sobre mundos posibles.

Kontakizunek munduak irudikatzeko prozesu sortzaileaz hitz egin digute, benetako alternatiba soziopolitikoetatik abiatuta, hala nola zaintza sareak, energia alternatiboko enpresak, etab. Etorkizunera begira, erantzun moderno eta garaikide bat ematen dute erronka ekologiko, ekonomiko, kultural, sozial eta abarren aurrean, natura, giza eta teknologia baliabideekin dugun harremana kudeatzeko beste modu batzuk ikusteko asmoarekin.

Fabula horietatik, literaturak eta arteak mundu nahasi honen bilakaeran izan dezaketen zeregin erabakigarria planteatu dute idazleek, zentzu handiagoko mundu bat eraikitzen lagunduko diguten alternatibak balioesteko, eta, ildo horretan, etorkizunaren dekalogo bat proposatu digu liburuak.

Proiektuak erakutsi du gugan badagoela errealitatea eraldatzeko eta hankaz gora jartzeko gogoa. Borrokatzeko gogoa, azken batean. Zirriborroak eta gero da borroka horrek hartzen duen beste forma bat, disidentea eta kontrahegemonikoa, eraldatzailea, baikorra. Gauden honetan, funtsezkoa.