susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Genero-ekilibristen erredurak bereganatzeko poemak | Fan eta etorri »

Eraikuntzarako materiala / Eider Rodriguez / Susa, 2021

Aitaren heriotza Jon Martin-Etxebeste / El Correo, 2021-12-18

Aitaren heriotzaren prozesua eta ondorengo dolua maisutasunez kontatzen du Eider Rodriguezek; zendu ostean, harekin berradiskidetzeko irrika eta sendatu gabeko amorrua dira kontaketaren gidari. Eguneroko bat erabiltzen du orainaldiko tramaren berri emateko. Geruza hotz batez estalitako sumendia suma liteke kontaketa kronologiko horretan. Iraganean kokatutako traman, berriz, 80ko hamarkadako Errenteria edo Orereta deskribatzen ditu: klase sozialek eta politikak zeharkatuko jendartea.

Hiri horretan kokatutako etxeko eraikuntza materialen denda baten jabe da bere sendia. Haien arteko komunikazioaren harlauzak isiltasunez, gaitzespenez eta hoztasunez zipriztinduta daude. Aita alkoholikoa da eta haren mendekotasunak gailendu ahala haren ahalmenak murrizten doaz orrialdez orrialde. Harekiko lotsa, errukia eta maitasuna sentitzen ditu protagonistak, eta bere dolua osatuko badu, urteetan zehar aitarengandik babesteko eraiki zuen pareta eraitsi beharko du. Maitasun keinu bakanetan pausatzen den memoria da aitaren biografia berri baterako eraikuntzarako materiala.