susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Politikaz | Zaharrak berri-berri »

Leonardo / Fernando Morillo / Elkar, 2003

Leonardo da Vinci Javier Rojo / El Correo, 2003-07-16

Fernando Morillok Leonardo da Vinciren biografia eskaintzen dio euskal irakurleari, Berpizkunde garaiko jeinuaren izen bera duen liburuxka honetan. Bilduma honetako biografia gehienek dituzten ezaugarriei eusten die idazlan honek. Laburra da, arin irakurtzen den horietakoa. Batez ere gazteei begira idatzitako dibulgazio liburu honek amaieran kronologia bat aurkezten du, non Da Vinciren bizitzaren gertakari garrantzitsuenak, bizitzea tokatu zitzaion garaiko beste gertakari gogoangarrien parean agertzen diren. Eta bilduma honetako beste liburuekin gertatzen den bezala, irakurleak eskertuko luke bibliografiaren bat ere gaineratu balitzaio. Liburu honetan, dena dela, koloreko irudiak dituzten orrialdeak agertzen dira, pintorearen koadro eta marrazkiez hornituak. Honelako biografia labur batean, jakina, ezin sakon daiteke pertsonaia konplexu horren alderdi guztietan, idazlea Da Vincik egindako lan desberdinen berri ematen saiatu arren. Ideia batzuk, ordea, azpimarratuta geratzen dira liburuan: Da Vincik naturan aurkitu zuela bere inspirazio iturri nagusia; aurreratua izan zela, hau da, legokiokeen garaian baino lehenago jaio zela… eta batzuetan hainbeste sakabanatu zituela bere lanak, non hasitakoa amaitzea kostatzen baitzitzaion.