susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Just a little bit harder | Padura »

Sua falta zaigu / Katixa Agirre / Elkar, 2007

Sua falta zaigu Amaia Trejo Aldekoa / Begitu, 2020-03-17

Katixa Agirreren (Gasteiz, 1981) lehenengo liburua dogu hau, giza harremanak oinarri dituan zazpi ipuinez osotutako narrazino bildumea.

Sua falta zaigu izenburua dauan kontakizunak emoten deutso hasikerea liburuari. Istorio guztietatik personaia gazteenak ageri dira bertan. Nerabe bi ditu protagonista. Zigarroa erreteko sua baino ez jakie falta eta berau lortzeako agure baten igurtziak onartzeko prest ei dagoz. Sasoi ausarta azaltzen da ipuin honetan, bizitzari bildur barik begiratzen deutsan aroa.

Umezarotik helduarorako itzulera bako salto hau, danok gertuago edo urrunago gure barruan ondo gordeta daukaguna, askotan ekarten deusku gogora Katixa Agirreren liburu honek eta baita zelan eragiten dauan sasoi horrek etorkizuneko harremanetan eta harremanakazko gure begiradan.

Kontakizunetan aurrera egin ahala era askotako “faltak” agertzen doaz: desengainuak, harreman eraldaketak, hausturak, hutsuneak, huts egiteak… eta irakurleak antzeko bizipenetara bidaia egiten dau, bere urrutiko dezepzino, melankolia sentimentua azaleratuz. Gainera gertakizunak oso errealak dira, egunero edonon edonori gerta dakikeozanak, eta hasikeratik personaiakaz bat egitea lortzean dau.

Lehenengo orrialdetik engantxatzen dauan irakurketa errazeko liburua da hau. Istorioen amaierak irakurlearen esku ixten ditu eta norberari emoten deutso aukerea personaia horreen etorkizuna eregiteko. Gerora Agirrek idatzi dauan Amek ez dute eleberrian legez ironia eta zorroztasuna gailentzen dira bere idazkeran, beti hizkuntza erraz eta hurbil baten.

Beti zerbaisten faltan gagozanok, badogu surik?