susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Tristuraren digresioak | Pandemiaren azaletik »

Nobela errealista bat / Joxean Agirre / Elkar, 2020

Parodiaren bideetatik Javier Rojo / El Diario Vasco, 2020-05-03

Joxean Agirrek literatura idazten duenean, irakurleek denbora dibertigarria pasa dezaten nahi du, hauxe da bere helburu nagusia, eta oinarrizko planteamendu hau ezin da bazterrean utzi “Nobela errealista bat” bezalako idazlan baten aurrean gaudenean. Denbora dibertigarria pasatzeko parodian errotzen den umorea du lanabesik garrantzitsuena. Eleberri honen kasuan protagonista taxizalea da, eta bere bezeroei abertzaleen istorioak kontatzeko ohitura du. Taxizalea ezin esan daiteke bere bizitza oso zoriontsua denik, emazteak maitalea du eta. Argumentua gorabehera handirik gabe aurrera doa narratzailearen papera ere jokatzen duen taxizaleak istorioak eta anekdotak kontatzen dituelarik. Baina eleberriaren izaera aldatzen da emaztearen maitalea, idazle bat, modu arraroan hiltzen denean.

Momentu horretan argumentuak bihurgune errokanboleskoa eginda, protagonistak idazle hori idazten ari zen nobela bukatu beharko du, haren heriotzaren gorabeherak argitzen dituen bitartean. Thriller politiko poliziakoaren parodiara lerratzen da liburua. Parodia denez, honelako literaturan ohikoak diren topikoak erabiliko dira edonon. Hor agertuko da ikerketan laguntzaile moduan neska gazte panpoxa. Hor agertuko dira gaizkile arriskutsuak, eta borrokak… Bestaldetik, narratzailearen elukubrazioen artean nobelagintzari buruzko teoria modukoa agertuko da, joko metaliterariorako aukera ere ematen duena. Nobelak, beraz, elementu desberdinak nahasten ditu, irakurlea dibertitzeko helburu argiarekin.

Edonola ere umorea erabiltzen denean kontuz ibili behar da errepikapenekin. Abertzaleen anekdoten sorta hain luzea da, ia amaigabea, argumentuarekin erlazio argirik ez duten istorioen segida izanik gainera, non azkenean, dibertigarria izateari utzi gabe ere, pixka bat nekagarria gerta daitekeen nobela hau.