« Ahozko literaturaren altxorra | Herriaren hatsa »

16 ipuin amdodiozko / Xabier Mendiguren Elizegi / Susa, 2002

Amodioaz edo Javier Rojo / El Correo, 2003-04-16

Xabier Mendiguren Elizegik aspaldian idatzitako eta argitaratutako ipuin batzuk berreskuratu nahi izan ditu “16 ipuin amodiozko” izeneko bilduma hau egiteko. Izan ere, liburu honetan agertzen diren istorio gehienak 80ko hamarkadakoak dira, idazlea zuriaren gainean beltza jartzeko zereginean hastapenetan zegoenekoak alegia. Eta datu hau, nahitaez, kontuan hartu behar du irakurleak, nire ustez, nabarmena baita liburu honetan agertzen zaigun idazlea batzuetan duda-mudatan ibiltzen dela ikaste prozesu horretan murgilduta. Istorio hauek guztiek, izenburuan iradokitzen den moduan, aldez edo moldez amodioarekin zerikusia dute, baina amodio hitza, batez ere, sexu-grinaren zentzuan ulertu behar da hemen. Gehienak broma antzekoak dira, barre egiteko sortutako txantxa dibertigarriak. Noizean behin begi-bistakoa da idazleak probokatzeko duen gogoa ere. Gaur egungo irakurlea, ordea, nekez sentituko da probokatuta han kontatzen diren istorioekin, denborak euskal irakurlea ere denetara ohitzera behartu baitu. Bestaldetik, idazlea ikasteko prozesuan dagoelarik, teknika desberdinak erabiltzen ditu, aukera eta posibilitateak aztertuz. Liburu honi gehiegi eskatzen ez bazaio, dibertigarria ere izan daiteke denbora-pasarako.