« Koaderno pertsonala | Ironiaren gertutasuna »

Stalin / Joseba Arruti / Elkar, 2002

Tsar gorria Javier Rojo / El Correo, 2003-02-12

Joseba Arruti kazetariak “Stalin” izeneko biografia honetan, urte askoan Soviet Batasunaren ibilbidea zuzendu zuen politikariaren bizitza du kontagai. Dibulgazio liburua da eta biografietan ohikoak diren planteamenduak jarraitzen dira: hasi, Stalinen jaiotzarekin hasten da kontakizuna eta, bertako orrialdeetan zehar, igoera baten berri ematen zaigu, non gailurra II. Mundu Gerran ikusiko baita, haren heriotzarekin amaitu arte. Liburua, dena dela, bi momentutan zentratzen da. Alde batetik, Stalinek botere osoa lortzeko eta bere eskuetan mantentzeko ahalegin paranoikoa kontatzen zaigu nahiko zehatz. Bestetik, II. Mundu Gerraren kronika egiten zaigu Stalinek bertan izan zuen partea azalduz. Bi interes gune horiek pertsonaiaren alderdi ezagunenak gogoratzen dituzte: diktadore paranoikoa eta nazismoaren zapaltzailea. Biografia argitaratzen den bilduman ohikoa denez, amaieran kronologia labur bat ere eskaintzen da. Bertan, zenbait daturi perspektiba bitxia ematen zaie, zerikusirik ez duten gertakariak bata bestearen ondoan agertzean (hala nola Stalin apeztegian sartu, Aranak EAJ sortu eta D. Ibarruri jaio). Liburuak, edonola ere, hutsune bat dauka: gaia hobeto ezagutu nahi duenak bibliografia osagarri bat egotea eskertuko luke.