« Denak ez ziren garaile suertatu | Waterloo-n galdutakoak »

Muga / Felipe Juaristi / Juan Ramon Makuso / Pello Otxoteko / Aritz Gorrotxategi / El Gallo de Oro, 2016

Hitzaren bidelagunak Jose Luis Padron / Bilbao, 2017-01

Gallo de Oro argitaletxeak Felipe Juaristi, Juan Ramon Makuso, Pello Otxoteko eta Aritz Gorrotxategiren poemak biltzen dituen antologia kaleratu du, Muga izenburuarekin.

Felipe Juaristik zazpi poesia liburu idatzi ditu, horien artean Galderen Geografia, Aingeruaren Angelua eta Piztutako Etxea. Juan Ramon Makusoren lanen artean Hiri gorazarre, Huntza hezur berritan edota Hitzak argi liburuak daude. Pello Otxotekok Haraindiko begiradaren bila, Itzalaren ñabarduretan edo Anphora baita bezalako lanak argitaratu ditu. Eta Aritz Gorrotxategiren poesia lanen artean Zaldi hustuak eta Hariaz beste poesia liburuak aipa daitezke.

Lau sortzaile euskaldun horiek orain liburu bakarrean elkarrekin ez da kasualitatea, 2008az gero, Pentsamenduaren Poesia jardunaldiak lotuta baitaude, jardunaldien bultzatzaileak ere diren aldetik, eta, dena ondo bidean, bederatzigarren edizioa burutuko dute ateak ireki berri dituen 2017 honetan. Lau idazleen arteko harremana sendotu egin da, beraz, eta Muga liburua horren froga da.

Lehenik eta behin, Muga elebiduna dela zehaztu beharra dago. Gurean ez da hain ohikoa liburu elebiduna ateratzea, eta euskaraz eta gaztelaniaz aldi berean kaleratu dute, hizkuntza bien arteko mugak gainditzeko, zubiak eraikitzeko.

Liburuan lehendik idatzitakoak eta poema berriak daude, propio egindakoak, eta Juan Manuel Uria editoreak kronologikoki osatu ditu. Bilduma modukoa da, borobila, egile bakoitzaren poesia partikularrarekin, bakoitzaren ñabardurekin, baina giza-katearen transzendentzia izpiritual berean oinarritua.

PostModernotasun honetan hitzaren duintasuna berreskuratu nahia eta, zalantzaz zalantza, giza ezagutza bilatzen duten poemak, hariak eta muturrak elkarren artean hizketan jartzen dituzte lau poetek eta euren lanak, euren hitzak, euren ahotsak, gauza bera diren poesiaren eta bizitzaren argia bilatuz beti ere.

Poesiak bizitza transmititu behar du, bestela huts egiten du. Eta poeman esaten dena zenbat eta egiazkoagoa izan, orduan eta biziagoa izaten da poesia. Muga antologia bizitzea tokatu zaigun garai honen egia konkretu bat da.