susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Bizitzaren argitzalak | Plazerez tundran zehar »

Rebel Mayo Colorao / Paddy Rekalde / Txalaparta, 2002

Rebel Mayo Colorao Ana Unanue / Aizu!, 2002-12

Istorioa: Paddy Rekaldek ihesaldi baten kronika idatzi du bere aurreneko eleberrian. Protagonista Jon Rebel Mayo Colorao dugu, Nafarroan ezkutuan ibili ondoren Irlandara ihesi joango den euskalduna.

Emaitza: Deustuar idazleak erritmo biziko nobela nahi zuen,eta halakoxea atera zaio. Narrazioa ez da lineala; orainak iraganera eramango gaitu,eta joan-etorriko bidaia horretan hamaika istorio eta abesti txertatzen dizkio egileak hari nagusiari. Hala, iheslariaren bakardadearekin batera, Erriberako putetxe bateko gorabeherak errepublikarren borroka zahar eta berriak, sexua, maitasuna, taberna zuloetako giroa, musika erreferentzia anitz eta arrasto punkiren bat aurkituko ditu irakurleak. Denetik eta nahas-mahas, botikan bezala. Hori guztia alkoholean ongi bustita eta tabakoaren keak lagundurik liburuan ez baitago tragoxkarik edo zigarrorik gabeko pasarterik.

Nabarmentzekoa: egileak zuzen-zuzen, batere apaindu gabe, kontatzen ditu gauzak. Pertsonaiek larrua jotzen dutenean, larrua jotzen dute. Irakurleak alferrik izango du irudimena, egileak ez baitio tarterik utziko. Paddy Rekalderen estiloa da, errealista eta indartsua haren jarraitzaileentzat, arruntegia eta estereotipoz josia mokofinentzat. Horregatik, Whiskey koloreko gauak (Txalaparta, 1999) gogoko izan zuenak gustura irakurriko du hau ere, eta gogoko izan ez zuenak… ba, bila dezala beste zerbait Durangon.

Esaldia: “Ze gutxitan marrazten dugun zikoina geure ipuinetan… arrano gehiegi eta zikoinaren arrastorik ez”.