susa | literaturaren zubitegia | literatur emailuak | armiarma | klasikoak | aldizkarien gordailua | basquepoetry | euskarari ekarriak

« Ez da ezer gertatzen | Ibiltariaren galderak »

Hurrengo itsasgoraren zain / Josu Penades / Ibaizabal, 2002

Gazteen harremanak Javier Rojo / El Correo, 2002-09-04

Neurri handi batean gazte literaturaren alorrean koka daiteke Josu Penadesek idatzitako “Hurrengo itsasgoren zain” nobela hau. Institutuan ikasten duten pertsonaiak dira protagonistak, eta haien arteko harremanak, nobelan zehar garatzen diren gaiak. Pertsonaia nagusiek triangelu bat osatzen dute. Honen erpinak Manu, narratzaile-protagonistaren papera jokatzen duena, eta bi neska, Izaro eta Graxi. Bi neska hauen konfidentea da Manu, haien arteko adiskidantza eta haserraldietan. Neska bakoitzak, ordea, ez jakin besteak ere Manu aukeratu duela konfidentetzat. Irakurle gazteei istorioa gusta dakieke, azken finean hauek beren burua nolabait islatuta ikus baitezakete zeharo normalak diren nerabe hauen gorabeheretan. Irakurle helduagoek, ordea, besterik bilatu behar. Hauek narratzaile-protagonistaren paperari errepara diezaiokete. Honen hitzetan, kontzientziaren jario batean ia, bat egiten dute berari gertatzen zaizkionek eta bere sentipenek. Honekin batera, protagonistaren oroitzapenek, eta neskek beren konfidentziak kontatzeko erabiltzen dituzten hitzek ere elkarrizketa moduko bat sortzen dute testuan, gertaera beraren aurrean perspektiba desberdinak eskainiz. Izan ere, kontatzeko erak ere interesgarri bihur dezake nobela bat.