susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Argiaren erreinua | Batetik bestera »

Batzarra, gure gobernua / Pablo Sastre / Elkar, 2013

Herri batzarraz Javier Rojo / El Diario Vasco, 2013-06-13

Pablo Sastrek fikziozko literaturaren alorrean aritzeaz gain, gai politikoen inguruko saiakera-liburuak ere idatzi ohi ditu. Bigarren arlo honetan sartzen da Batzarra, gure gobernua izenburua duen liburu hau. Etorkizunari begira, Euskal Herriaren sustraietan aurkitzen omen den batzarrean arreta jartzea proposatzen du Sastrek. Izan ere, estatuak, edozein estatu, frantsesa eta espainola zer esanik ez, baina baita balizko euskal estatu bat ere, mesfidantzaz begiratzen dira orrialde horietan. Beraz, Euskal Herriaren antolamenduaren oinarrian estatu abertzalea ez, baina batzarra egon beharko litzateke. Eta horretarako atzera jotzen du eta historian euskal batzarrek izan duten bilakaera azaltzen du.

Badago Sastrek erabiltzen duen argumentazioan nire ustez huts egiten duen planteamendu bat: batzarrek historian izan duten bilakaera aurkezterakoan, komunitate txikietan banatutako gizarte batean egiten ziren batzar horiek izan zituzten gora-behera historikoak azaltzerakoan, batzar horiek gaur egungo egoerari egokitzeko erakusten duten ezintasuna nabarmendu besterik ez da egiten. Batzarrek bere funtzioa izan baitzuten historia-momenturen batean, baina, gizarteak konplexuagoak izan ziren neurrian, desagertuz joan ziren. Eta gaur egun, populazioa batez ere hirietan bizi delarik, ezinezkoa begitantzen da batzarretan antolatu nahi hori. Beste era batean esateko, mundu tradizional baten lilurapean idatzitako liburua dirudi honek.

Edonola ere, Pablo Sastrek beti zerbait interesgarria eskaintzen du eta kasu honetan idazkera aipatuko nuke. Nola azal liteke liburu honetan erabiltzen den idazkera? Saia zaitez imajinatzen edozein estilo-zuzentzailek amesgaiztorik gaiztoenean aurkitu nahi ez lukeen idazkera… Honek, behintzat, estilo markatua erabiltzeko asmoa duela esan nahi du, eta jarrera hori eskergarria iruditzen zait.