susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Mila aldiz bisitatua | Komun kitzikagarriaren gainetik »

Ez zuten erantzun / Oier Santos / Erein, 2012

Ez zuten erantzun Lurdes Imaz / Aizu!, 2013-05

Oier Santosen (Errenteria, 1982) lehen nobela dugu hau. Sei laguneko koadrila baten unibertsitate garaiko gorabeherak kontatzen ditu: lagun berriak, amodio eta desamodioak, ostegunetako parrandak, eta abar. Danel, haren neskalagun Ela, Jaitz, Garazi, Nikole eta Hodeik osatzen dute lagun taldea. Danel farmazia ikasten hasi da Gasteizen, Hodei lanean hasi berria da eta gainontzekoek Leioako campusean ekin diete ikasketei. Elkarri bisitak egiteko, osabak Jaitzi oparitutako autoa baliatuko dute.

Sei lagun horien unibertsitate garaiko ohiko egoerak ezagutuko ditugu nobelaren hasierako orrialdeetan, gertakizun misteriotsu batek haien arteko harremanak goitik behera aldatuko dituen arte. Kontakizuna ez da lineala, jauzika baitabil denboran: aurretik atzera kontatzen da. Egileak oso atsegin du Christopher Nolanen Memento filma, eta handik hartu du kontatzeko modu hori: Santosek ere erdian kokatu du bukaeran kontatu beharko lukeena, eta misterioa modu dosifikatuan argitzen saiatu da.

Halere, ez du interes handirik sortzen irakurlearengan, ez istorioak, ezta kontatzeko moduak ere. Izan ere, kontatzen dituen egoerak topikoegiak gertatzen dira askotan, ezagunegiak, agian, unibertsitate garaiak bizi izan ditugunontzat. Gainera, asko errepikatzen ditu oso antzekoak diren egoerak. Deskribapen zehatzegiek ere tarte gutxi uzten diote irudimenari.