susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Izkiriaturik aurkitu dudan ene saiakera | Zaharrak ez zuen hil nahi »

Dorian Grayren egiazko erretratua / Aitor Arana / Txalaparta, 2011

Idazlea, libre Juan Ramon Makuso / El Diario Vasco, 2012-01-13

Ez da erraza garai jakin batzuetan, gizarte bakoitzean, norberak bere baitan duena, bere barruak agintzen dioena idaztea, hitz egitea. Esango nuke nolabaiteko autozentsura bat dagoela bakoitzak adierazi nahi duen horretaz. Aitor Aranak Dorian Grayren egiazko erretratua eskaini digu oraingo honetan, eta liburua idazteko Oscar Wildek idatzi zuen The picture of Dorian Gray liburuaren nolabaiteko berridazketa bat egin du. Eta arrazoi nagusia ariketa hau burutzeko izan da, arestian aipatu dudan arrazoia: Oscar Wilde ez zen ausartu benetako kontakizuna osatzea, ez zuen adorea izan bere barruak esaten ziona idazteko. Azken finean, kontakizuna bere benetako izaera sexualean oinarritu behar zuen, bere homosexualtasuna jende aurrean agerian utzi behar zuen. Originalean edertasunaren gorazarre bat egin nahi izan zuen Wildek, nolabaiteko betierekotasun bat aldarrikatuz gizakiarentzat. Edertasun horretan Dorian Gray da protagonista eta Basil Hallward artista bat da, margolaria, gaztearen edertasunaz liluratuta geratzen dena. Tartean Lord Henry Wotton aurkitzen da. Erlazio honetan Wildek ezkutatu egin zuen ezaugarri homoerotikoak; Aranak, aldiz, hauek azpimarratzen ditu eta eleberrian zehar elementu hauek era jostalari batean azaltzen dira, eta era honetan freskotasuna ematen dio kontakizunari. Erlazio gayak, gizonen arteko sentimenduak, naturaltasunez deskribatzen ditu idazleak, eta giro hau deskribatzeko, nabarmen geratzen da egileak oso ongi ezagutzen duela Oscar Wilden atmosfera literarioa. Bere ariketa esan behar da guztiz askea izan dela eta Aranak bertsio oso librea egin duela. Eta esango nuke, publiko gayrentzat zuzendutako kontakizuna dela. Disfrutatzeko.