susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Egia eta fikzioa | Absurdua »

Beste bat apalerako / Askoren artean / Mikelazulo kultur elkartea, 2001

Beste bat apalerako Joseba Bergara / Txalaparta, hitzak & ideiak, 2002-03

Oreretako Mikelazulo elkartea ezaguna da etengabe antolatzen dituen ekitaldi kulturalei esker. Taberna, liburutegi, bilgune… urteen baitan Oreretako gazteen erreferentzia bihurtu den lekua, apurka, nazio mailan ere nabarmentzen joan da egindako lanari esker.

Orain, herriko eta inguruko lagunen lanak bildu eta beste urrats bat eman dute, Beste bat apalerako liburua argitaratuz. Poemak, narrazioak eta ilustrazioak biltzen dira ia 200 orrialdeko liburua osatuz. Eta izenburu bereziak hala iradokitzen badu ere, ez da apalerako beste liburu bat. Berezia da hau. Sormenaren munduan lanean dabiltzan egileei leku egin nahian argitaratua izan den heinean, behintzat. Aitzol Ezeiza, Ane Gojenola, Asier Sarasola, Garazi Urdanpilleta, Jokin Zuzuarregi, Jon Pikasarri, Juanma Sarasola, Miren Salaberria, Oier Gillan eta Urtzi Urkizu aritu dira idazten, Asier Errazkin, Idoia Bertarabide Igor Errazkin, Iker Badies, Maider Kalonje eta Txuma Vazquez ilustrazio lanetan. Hitzaurrea, berriz, Javi Barandiaran aktorearena da. Egileetako zenbait kazetari gisara ezagutu ditugu hedabideetan, edota literatura lehiaketetan gailentzen ikusi ditugu. Beste batzuk, aldiz, ezezagunak zaizkigu. Eskertzekoa da, beraz, egile berriak ezagutarazteko ahalegin hau eta, baita ere, era berean, egileak liburua aurkezteko herrietan barrena egiten ari diren emanaldiak.

Hainbat ezusteko eder aurki daitezke liburuan barrena. Gehienentzat egile ezezagunak izan daitezkeenetako horiek emanak askotan. Literatura ona. Hitz ederrak. Ezusteko atseginak. Txalotzeko ahalegina, benetan.