susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Ura nonbait | Suspensearen karrikak »

Txakur ingelesak / Lutxo Egia / Susa, 2011

Txakur ingelesak I.E. / Aizu!, 2011-09

Bederatzi ipuin, hainbat kokaleku eta beste horrenbeste desagertzeko modu. Nola bururatu zaizkio Egiari ikusezin bihurtzeko hainbeste era? Beharbada, horretarako gogoa izango du idazleak berak ere… Ipuinotako protagonistek, bai, desagertu egin nahi dute, edo norbaitek desagerrarazi nahi ditu. Horretarako, dezente aukera ezberdin aurkezten dizkigu idazleak bilduma honetan: heriotza, kartzela, ihesa, ezkutatzea, bakardadea, alderrai ibiltzea, deitura eta itxura aldaketa… Baina hori da narrazio hauek guztiek komunean duten elementu bakarra, protagonisten ikusezintasuna. Hortik aurrera, era guztietako lekuak (ia guztiak ezagunak eta xehetasunez deskribatuak) eta pertsonaiak aurki ditzakegu bertan: Lanzaroten bizi den bikote jubilatu atzerritarra, Mexikora joan eta lagun japoniarra egiten duen futbolari bilbotarra edota John Lennon bera.

Erreferentzia artistikoak, literarioak, musikalak, zinemari buruzkoak… ugariak dira, batzuk oso hurbilekoak eta errealak, beste batzuk urrutiagokoak edota fikziozkoak. Horiek guztiek ederki laguntzen dute irakurlearen hasierako ikuspuntua kolokan jartzen, pertsonaiek bezala, benetakoa duten izaeraren eta nahiko luketenaren artean noraezean bezala aurkitzen baitira askotan. Nahaste horretan erdi galduta, beharbada ikusezin ez, baina inguruarekiko gor bihurtzen da irakurlea orri artean.