susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Zubia itzultzea | Harginaren eskarmentua »

Spray / Paddy Rekalde / Susa, 2011

Frontline Juan Ramon Makuso / El Diario Vasco, 2011-06-17

Iristen da une bat non bakoitzak bere lekua hartzen duela. Esango genuke eserleku bat, eta handik egin dezakegu ariketa franko. Paddy Rekaldek, Spray poesia liburuan, paretak, hiria, musika, putak, gizarteko baztertuak…, marrazten ditu, kasu honetan, spray poteak bere eskuan hartuta. Gure kaleetan spray baten koloreak ikusita, erreferentzia askoko irudiak gureganatzen ditugu, “Hori guztia eta gehiago eskuratu dute / halako free self service berri batez / supermerkatu ondoko kontainerretatik, / saiak ardi hilen inguruan bezala, hara bildu direnek”. Poeta bizkaitarra ezaguna da bere ibilbide literarioan, poemategiz poemategi, erakusten duen aldarrikapengatik, beharbada poesiari emanez halako rol sozial bat. Ez dugu lerratuko Celaya, Blas de Otero, Aresti, eta mota horretako poetekin, beharbada Paddy Rekaldek ematen dion tonua, ez delako aipatutako poeten berdina, baina giro soziala nabarmentzen da Rekalderen poesian, “Erletxeta Fucktory (Sex in the Basque Country) / halakoa izan ote zen Arantzazuko aparizioa? / hainbatek marketing izugarria iritziko zion kontuari / takoi luzeen gainean zebilen giza lurrikara ikusi barik”. Salaketa da Paddy Rekalderen tonua, batzuetan nolabaiteko errieta tonua ere agertzen da hainbat poemetan, beharbada egileak poesiaren eginbeharra hori irudikatzen duelako.”Mickey Mouserenarekin pareka dezaketen / (a! pop artea zoragarria zara…)”. Izaera oso markatukoa dela ezin ukatu, abangoardiarekin zentzu klasikoenean harremanetan ipintzen dituena. Hortaz, poesia modu hauek maite ez dituenak nekez asebeteko du Paddy Rekalderen azkeneko lanak, eta alderantziz, halakoak maite dituenak nekez topatuko du ezer harrigarririk. Irakurlea ez da asaldatuta geratuko, ez eta engainatuta.