kritiken hemeroteka

7.634 kritika

Azken kritikak

« | »

Hiru koaderno txiki / Fermin Erbiti / Pamiela, 2011

Egilea aurkilea izaki Mikel Asurmendi / Irunero, 2011-06

Grisa, berdea eta gorria ziren koadernoak. Koaderno txiki haien amalgamatik Hiru koaderno txiki erditu du Fermin Erbitik. Txikia baina bizia. Gezi zorrotzenak gorritik bilduko ote zituen nago. Horiek azken orrialdeetan ageri dira, (In)komunikazioari emandako behako zoliak biltzen dituen atala, kazetarioi jaurtikitako geziak.

Abiatu baina paradisutik abian da Fermin Erbiti. Fermin Kupido antzo imajinatu dut, paradisuetako liburutegietan arakatzaile. Mitologiako kontuetatik gaurkoetara bide egin du bilatzaileak. Aspaldiko eta gaurko idazle eta pentsalarien esaldien hariekin osatu du sarea: armiarmaren gisara, harian-harian eta ezari-ezarian.

Txatalez txatal hariak irun ditu, besteengandik bildutako eleak ehun ditu: txatalen josketak eleen berezko zentzuari are izari handiagoa eman dio. Hainbat pasarte ifrentzuz paratu ditu egileak, ahalegin zinez eskergarria. Aurkilea da funtsean liburuaren egilea. Egunsentian errainuak nola, hala bilatu ditu aurkile honek erranairuak. Zoriontasuna xerkatu du apalategitik apalategira, eta osasuna eta oroimena kontrakarrean aurkitu: “Biak funtsekoak dira, baina modu kontrajarrian”. Osasun ona bezain garrantzitsua omen da oroimen txarrekoa izatea, gaztigatu digu halaber Erbitik. Eskergarria berriz ere.

Zoriontasuna helezina izaki, hizkuntzaz gozatuz gero, tarteka-marteka ukitu daitekeela ohartarazi digu Erbitik, eta ohartarazi ere arauek oztopatzen digutela hitzekin gozatzea. Eta, bistan da, arazoa ez dela, hizkuntzarena, hizkuntza darabilgunona baizik.

Arau egileak, besteak beste, politikariak direla eta Fermin kupidoak ez du kupidarik (barkatu hitz joko erraza) haiekin. Politikariek ez baitute irakurtzen. Agian, prestuagoak balira gezurrak hobeto sakatzen ikasiko lukete. Tira, hori nire ondorioa da.

Beste hari asko ehun ditu aurkileak. Bila ezazu. Zoaz eta bila!

Kapuscinkiren aipua aurkituko duzu bidean, adibidez: “Kazetari onaren ezaugarri nagusiak umiltasuna eta enpatia dira”. Kazetari izan gabe, gomendio paregabea edonorentzat. Kazetaritza berriaren xedea ofizioa bezain zaharra dela gogoratu digu aurkileak (in)komunikazioari eskainitako txatalean. Kazetarioi agintarien gezurrak salatzea ahaztu zaigu ordea. Teknologia berriek erredakzioan —eta etxean— gatibatu —kaletik urrun gatibu bihurtu— gaituzte. Martxan honetan kupido berak ez gaitu libratuko. Tira denak ez dira negar anpulak. Ez gaitzala laborriak guztiz jo. Gure kupidok badaki apalategiko hautsa ondo astintzen eta. Eta hala astindu ere Cuaderno amarilloren —izenak izanari ederki dagokio antza— egilea, Salvador Paniker idazlea.

Barkatu ironia. Liburutik jaso dut.

Azken kritikak

Suak pizten direnean
Mikel Soto

Irati Majuelo

Xala
Cynthia Ozick

Ainhoa Aldazabal Gallastegui

Dendaostekoak
Uxue Alberdi

Ibon Egaña

Poesia, zaurien ukendu
Ainhoa Urien

Javier Rojo

Argiantza
Pello Lizarralde

Mikel Asurmendi

Dendaostekoak
Uxue Alberdi

Arantxa Iturbe

Haize-lekuak
Amaia Telleria

Nagore Fernandez

Sano erradikal
Isabel Diaz

Aiora Sampedro

Dendaostekoak
Uxue Alberdi

Javier Rojo

Larrutik ordaindua
Joseba Lozano

Mikel Asurmendi

Moskito
Igor Estankona

Mikel Urkixo Aierdi

Ene baitan bizi da
Maddi Ane Txoperena

Amaia Alvarez Uria

Dendaostekoak
Uxue Alberdi

Irati Majuelo

Aro beilegia
Lizar Begoña

Hasier Rekondo

Artxiboa

Urria 2020

Iraila 2020

Abuztua 2020

Uztaila 2020

Ekaina 2020

Maiatza 2020

Apirila 2020

Martxoa 2020

Otsaila 2020

Urtarrila 2020

Abendua 2019

Azaroa 2019

Hedabideak