susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Hiru zoro eta erdi | Auto…biografia? »

Autokarabana / Fermin Etxegoien / Pamiela, 2009

Autokarabana E.B. / Aizu!, 2009-12

Fermin Etxegoien kazetari oñatiarraren lehen eleberria da Autokarabana. Lehen ere saiakera bat argitaratu zuen, Neurona eta zeurona, baina hauxe da nobelaren mundu honetan egiten duen lehen pausua. Abiapuntu ona. Fermin Etxegoienek euskal gizarte modernoaren erretratu berezia egiten digu bere lan honetan, estruktura korapilatsu, baina era berean ulergarri eta jarraitzeko erraz baten bidez, espero ez dugun amaierara eramaten gaituena.

Gure gizarte honetan egunero bizi ditugun hainbat eta hainbat egoera arrunt eta ez hain arrunt deskribatzen dizkigu, denetan ironia puntu bat eta ikuspegi pertsonala ezarrita. Hortxe dira hiria eta herriaren arteko berdintasun-desberdintasunak, herri eta hiri minak, bikote harremanak, zaharrak zein berriak, elkarrengandik aldendutako gurasoen gorabeherak, seme-alabekiko harremanak, lana eta langabezia, kooperatiben mundu zabal-itxia, edozertarako egin ohi diren “plan estrategiko” famatuak eta euskara… Euskararen inguruan, zenbat aipamen eta ikuspuntu!!! Euskaldun zaharrak, berriak, galdutakoak, berriz ikasitakoak, erraztasuna dutenak eta trakets dabiltzanak, euskara bizimodu dutenak, militantziarako erabiltzen dutenak, aitzakiatzat hartzen dutenak… Hainbeste gairen inguruan hausnarketarako balio duen eleberria, duda barik, norberak bere gustukotzat ala ez hartuko dituenak, baina, ziur gaude, edonori pentsaraziko diotenak.

2. mailatik gorakoentzako nobela da oraingo honetan dakarguna.