susa | literatur emailuak | literaturaren zubitegia | euskarari ekarriak | armiarma | klasikoak | aldizkarien gordailua | basquepoetry | ipuina.eus | ganbila.eus

« Aulki-jokoa | Talatik datozen tiroek ez dute aberririk »

Euskal kultura? / Antton Luku / Pamiela, 2009

Hor konpon Itxaro Borda / Berria, 2009-06-10

Maiatz-en solasaldietan piztu zitzaidan Pamielan agertu Antton Lukuren Euskal kultura? saiakeraren irakurtzeko gutizia. Antzerkian eta literaturan ospetsua da eta haren hitzak ez dira sekula anodinoak. Ebats ezin eta erosi dut orrialdez orrialde odol uholdeak eta hilotzak aurkituko nituela esperoan, baina egilearen erresumina menderatuz pentsatu idatzi pausatua dela ohartu naiz. Diru-laguntzen eta euskal kulturari josten zaizkien edukien politikaz ari zaigu, Frantziaren eskualde hizkuntzen aurkako erasoez, bukatzean aterabide zenbait proposatzen dizkigula.

Ulertzen dut onarpenaren deia kultura alorrean bereziki euskaraz ari garenontzat, baina jakin dezagula iparralde honetarik ez gaituztela nehoiz Euskal Herriko merkatuan zein Frantziako sosez lagunduriko elite sortzaileen lerroetan kokatuko, diru horren partea gurea izan arren, zerga-ordaintzaileak garenez.

Ondorioz, ezagupena eman diezaguketen norma dogmatikoen atzaparretik ihesiz froga dezakegu gure survivor gisako ahalmena: nitaz egin dutenaz —objektu kolonial nazkagarria— nik nahi dudana egiteko borondatean datza nire iraupen intelektualaren segurtamena.

Antton, zergatik ez dituk letren ordez egiazko izenak jarri?